ტაძრისში მცხოვრებ ხუციშვილებს სახლი ენგრევათ

ბორჯომის მუნიციპალიტეტის სოფელ ტაძრისში ხუციშვილების ავარიული სახლი, რომელშიც ორი ადამიანი ცხოვრობს, დანგრევის პირასაა. კედლებს ბზარები ყოველდღიურად ემატება.ოჯახის უფროსის განმარტებით სახლის შეკეთების საშუალება არ აქვს.

„არავინ ვმუშაობთ. სახლი გვერდზე გადაიწია, ოთახებში ისე წვიმს, როგორც გარეთ. მთელი ლოგინები სველდება წვიმის დროს.რამდენიმე დღის წინ ქარმა სახურავის ნაწილი აგლიჯა. ძალიან ცუდ დღეში ვართ“, – ამბობს მევლუდი ხუციშვილი.

ბორჯომის მუნიციპალიტეტის გამგეობაში განმარტავენ, რომ ხუციშვილებს სახურავზე დროებით გადასაფარებლად „ტენტი“ მიუტანეს, ასევე გეგმავენ მეორადი სახურავის მიცემასაც, თუმცა როდის არ იციან.

„როდესაც გამოჩნდება მეორადი სახურავი მაშინ მისცემენ, მაგრამ ვერ გეტვით როდის გამოჩნდება ეს სახურავი“, – ამბობს ბორჯომის მუნიციპალიტეტის გამგეობის საზოგადოებასთან ურთიერთობის სამსახურის წარმომადგენელი ლონდა ფილიშვილი.

მისი თქმით, ადგილობრივ ბიუჯეტში კერძო სახურავების გადასახურად თანხა გაწერილი არ აქვთ.

„ამხანაგობების ფარგლებში იხურება მრავალბინიანი სახლები. კერძო სახლების გადახურვა არ ხდება. რწმუნებულმა მითხრა რამდეჯემე აგური და ფიცარი მივეციო“, – ამბობს ლონდა ფილიშვილი.

ხუციშვილებს არც სოციალური დახმარება არ აქვთ და არც არასდროს ქონიათ.

„ისეთებს ეხმარებიან ვისაც დახმარება არ სჭირდება. 97.604 ქულა მომივიდა, რა ნახეს ჩემს სახლში ასეთი, რომ ამხელა ქულა მომივიდა. ჩემი მეუღლე შაქრიანია და დღეში სამჯერი ინსულინს იკეთებს. მის 100 ლარიან პენსიაზე ვართ“, – ამბობს მევლუდი ხუციშვილი.

სოციალური მომსახურების სააგენტოში განგვიმარტეს, რომ ხუციშვილების ოჯახი ბაზაში 2006 წლიდან არის რეგისტრირებული, თუმცა საარსებო შემწეობის მიმღებები არასოდეს ყოფილან. მაღალი ქულების დაფიქსირებას კი ასე ხსნიან.

„ოჯახში ერთი შშმ პირია და იღებს სოციალურ პაკეტს, როგორც შშმ პირი. ოჯახის უფროსი წერია, რომ არის ჯანმრთელი, აქვს მიზერული ხელფასი. ასევე აქვს უმაღლესი განათლება და ითვლება, რომ შრომით ბაზარზე კონკურენტუნარიანია, ასაკითაც ახალგაზრდაა. აქვთ მიწის ნაკვეთი, რაც ჯამში სამწუხაროდ მოქმედებს ქულაზე“, – აცხადებენ სოციალური მომსახურების სააგენტოში.

ხუციშვილებს სოციალური მომსახურების სააგენტოში ბოლო დეკლარაცია 2015 წლის ივლისში აქვს შევსებული. შესაბამისად მომავალი წლის ივლისამდე ახალი განცხადების დაწერის უფლება არ აქვთ. ოჯახი, გამგებლის წარმომადგენლის მიერ ნაჩუქარი „ტენტის“ იმედადაა დარჩილი.



[თინათინ ზაზაძე, ბორჯომი]