თურქულ ბარში დაკავებულების პროცესზე ნივთმტკიცებები გამოიკვლიეს

დღეს, რვა მაისს, ახალციხის რაიონულ სასამართლოში თურქულ ბარში დაკავებულების საქმეზე მე–17 სხდომა გაიმართა. პროცესი დაახლოებით სამ საათს გაგრძელდა.

სხდომა, შემთხვევის დროს ბარში მყოფი აზერბაიჯანის მოქალაქის წერილობითი ჩვენების გამოქვეყნებით დაიწყო. ჩვენება დარბაზში პროკურორმა კახა ლეკიშვილმა წაიკითხა: „მეგობართან ერთად ვიჯექი, შემოვიდნენ და დაიწყეს გინება, ხელებს იქნევდნენ. ჩემი მეგობარი და ბარის მეპატრონე ქალი სცემეს. ჩემ მეგობარს ხელებით და ფეხებით ურტყამდნენ, მუშტი მეც მომხვდა. რესტორნის მეპატრონე დამშვიდებას სთხოვდა, მაგრამ ესენი მაინც სცემდნენ და შეაფურთხეს“.

ბრალდებულების ადვოკატები ფიქრობენ, რომ მოსამართლემ აღნიშნული ჩვენება არ უნდა გაიზიაროს, რადგან ის სასამართლო დარბაზში არ დაკითხულა: „ეს მოწმე არ დაკითხულა საქმის არსებითი განხილვის დროს. მას იძულების წესით მიაცემინეს ჩვენება. მოეყვანათ სხდომაზე და დაეკითხათ, ის საქართველოშია“.

ჩვენების გამოქვეყნების შემდეგ ბრალდების მხარემ პროცესზე შემთხვევის ადგილიდან ამღებული მტკიცებულებები ვედრა, სკამი, ჭიქა და თეფშების ნამსხვრევები წარადგინა: „საგამოძიებო ექსპერიმენტის დროს ბარის მესაკუთრემ ზუსტად წარმოადგინა ის ადგილი, სადაც ბრალდებული ამ სკამის ჩარტყმას ცდილობდა“, – განაცხადა პროკურორმა.

ადვოკატები კი ირწმუნებიან, რომ ბრალდებულს სკამი არავისთვის დაურტყამს: „ამოღებულ ვიდეო–ჩანაწერში ჩანს, რომ სკამს ხელში იღებს ბრალდებული და ისევ დებს“.

სხდომის დასრულებამდე, ადვოკატებმა მოსამართლე მარიკა ჩიტაშვილს ბრალდებულებისთვის აღკვეთის ღონისძიების შეცვლა კიდევ ერთხელ სთხოვეს, თუმცა, მოსამართლემ შუამდგომლობა არ დააკმაყოფილა და დაკავებულები პატიმრობაში დატოვა.

მომდევნო პროცესი 14 მაისს 13:00 საათზე გაიმართება.

შეგახსენებთ, რომ შემთხვევა 2017 წლის ცხრა ნოემბერს, გვიან ღამით, ახალციხეში, ე.წ. საბარგო სადგურის დასახლებაში, ერთ–ერთ თურქულ ბარში მოხდა.ბრალდების მხარის მტკიცებით, ლ.ბ–მ, გ.კ–მ, და კ.ბ–მ ბარში შესვლა სცადეს, მათ იქ მყოფ საქართველოს და თურქეთის რესპუბლიკის მოქალაქეებს, შესვლისთანავე, ჯერ სიტყვიერი, შემდეგ კი ფიზიკური შეურაცხყოფა მიაყენეს, რა დროსაც თურქეთის რესპუბლიკის ერთ–ერთმა მოქალაქემ თავის არეში დაზიანება მიიღო. სამივე მათგანი პასუხისგებაში ხულიგნობის მუხლით მისცეს.

[მარიამ ბარძიმაძე, ახალციხე]