ახალციხის რაიონულ სასამართლოში თურქული ბარის საქმეზე გამართული მე–19 სხდომა, დაახლოებით, ოთხ საათს გაგრძელდა. მტკიცებულებების წარმოდგენა პროცესზე პროკურორმა კახა ლეკიშვილმა დაიწყო: „მოწმეების ა.ღ–ს, ნ.კ–ს, მ.მ–ს, ე.ს–ს და სხვათა მოწმის სახით გამოძახებისა და გამოკითხვის ოქმები. ოქმი ფოტოსურათების ამოცნობის შესახებ. მოწმე ა.ღ–ს ხელწერილი ბრალდებულების ამოცნობის შესახებ“....
მხოლოდ სათაურებითა და თარიღებით წარმოდგენილი წერილობითი მტკიცებულებები სასამართლო დარბაზში ბრალდებულ გ.კ–ს ადვოკატმა თამარ სადრაძემ გააპროტესტა: „სისხლის სამართლის საპროცესო კოდექსი ითვალისწინებს წერილობითი მტკიცებულებების გამოკვლევას და არა სათაურების წაკითხვას. პროკურორი ვალდებულია ყველა დოკუმენტი წაიკითხოს და თუ სრულად არ წაიკითხავს, მისი შინაარსი მაინც გადმოგვცეს“.
სადრაძის მტკიცებით პროკურორის მიერ წარმოდგენილი ოქმი, რომელიც ერთ–ერთ მოწმესთან დურდან მამედოვასთან ზარის განხორციელებას ადასტურებს, არასწორია: „ამ მოწმესთან დაკავშირება არ არსებულ ნომერზე მოხდა. ინდექსი რომელიც აქაა მითითებული, არცერთი ქვეყნის არაა. მას სხვა ნომერი აქვს და საინტერესოა იმაზე რატომ არ დაურეკეს?! ამიტომ ვფიქრობ, რომ არც პროკურორის წარმოდგენილი ოქმი უნდა დაერთოს საქმეს და არც ამ მოწმის წერილობითი ჩვენება. მე კი წარმოგიდგენთ ოქმს, რომელიც სწორედ იმას ადასტურებს, რომ ასეთი ინდექსი არ არსებობს და გთხოვთ ეს დაურთოთ საქმეს“.
მოსამართლე მარიკა ჩიტაშვილმა სადრაძის შუამდგომლობა ნაწილობრივ დააკმაყოფილა და განაცხადა, რომ მის მიერ წარმოდგნილ ოქმს საქმის მასალებს დაურთავს.
სასამართლოში სადრაძემ კიდევ ერთი შუამდგომლობა დააყენა, მან მოსამართლეს სხდომაზე ახალციხის სამმართველოს უფროსის ყოფილი მოადგილის დავით ბუცხრიკიძის დაკითხვა სთხოვა. მისი სახელი და გვარი საქმეში ხშირად ფიგურირებდა. იმ სხდომაზე, რომელზეც ბარიდან ამოღებული ვიდეო მასალები გამოიკვლიეს, ბრალდებულებმა ვიდეოში ბუცხრიკიძე ამოიცნეს. თუმცა, მოსამართლემ დაცვის მხარეს სასამართლოში მისი დაკითხვის შუამდგომლობა არ დაუკამყოფილა.
ამის შემდეგ სადრაძემ პროცესზე მისი დაცვის ქვეშ მყოფის გ.კ–ს შესაძლო ცემის ფაქტებზე სამედიცინო დოკუმენტები წარმოადგინა. მისი მტკიცებით, გ.კ. დაკავების შემდეგ სამცხე–ჯავახეთის პოლიციის დეპარტამენტის დირექტორმა ავთანდილ გალდავამ სცემა.
„ჩვენ ჩავატარეთ სასამართლო სამედიცინო ექსპერტიზა. ბრალდებულს დაზიანებული ჰქონდა თავი, საფეთქელი, კისერი და მუცელი, ასევე მაჯებზე აღენიშნებოდა ბორკილებით გადახეხილი კვალი. წარმოდგენილია, ასევე, ფოტო და აუდიო მასალა, რომელიც მეტყველებს, რომ ნაცემი დასიებული იყო და თავისი ფეხით ვერ გადაადგილდებოდა“, – ამბობს თამარ სადრაძე.
შემდეგი სასამართლო პროცესი 28 მაისს 14:00 საათზე გაიმართება. პროცესზე დაცვის მხარე საქმეში მონაწილე გამომძიებლებსა და სამედიცინო მუშაკებს დაკითხავს.
შეგახსენებთ, რომ შემთხვევა 2017 წლის ცხრა ნოემბერს, გვიან ღამით, ახალციხეში, ე.წ. საბარგო სადგურის დასახლებაში, ერთ–ერთ თურქულ ბარში მოხდა. ბრალდების მხარის მტკიცებით, ლ.ბ–მ, გ.კ–მ და კ.ბ–მ ბარში შესვლა სცადეს, მათ იქ მყოფ საქართველოს და თურქეთის რესპუბლიკის მოქალაქეებს, ჯერ სიტყვიერი, შემდეგ კი ფიზიკური შეურაცხყოფა მიაყენეს, რა დროსაც თურქეთის რესპუბლიკის ერთ–ერთმა მოქალაქემ თავის არეში დაზიანება მიიღო. სამივე მათგანი პასუხისგებაში ხულიგნობის მუხლით მისცეს.
[მარიამ ბარძიმაძე, ახალციხე]