2 სექტემბერი პირველკლასელთა რეგისტრაციის ბოლო დღეა

ახალციხის პირველ საჯარო სკოლაში 85 პირველკლასელი სამ პარალელურ კლასში ისწავლის. მე–5 საჯარო სკოლაში 143 პირველკლასელი 6 პარალელურ კლასში განაწილდება. მეექვსე საჯარო სკოლაში ახალ სასწავლო წელს 25 პირველკლასელია დარეგისტრირებული. მე–2 საჯარო სკოლაში 32 პირველკლასელს ელოდებიან, რომელთაგანაც 11 სწავლას ქართულ, ხოლო 21 რუსულ სექტორზე ისწავლის. მე–3 საჯარო სკოლაში 42 პირველკლასელია და აქ ორი პარალელური კლასი შეიქმნება. კერძო სკოლის „მზექას“ დირექტორის თქმით შენობის სიმცირიდან გამომდინარე მხოლოდ 14 პირველკლასელის მიღება შეძლეს.

სკოლის დირექტორები ამბობენ, რომ პირველკლასელთა რაოდენობა წინა წლებთან შედარებით გაზრდილია.

საჯარო სკოლებში ახალი სასწავლო წლიდან მნიშვნელოვანი სიახლეები არ იგეგმება. ერთადერთი სიახლე ისაა, რომ პირველი სკოლა რემონტისთვის ემზადება, მე–2 და მე–6 სკოლებში კი ექიმის კაბინეტი ამუშავდება.

გასული სასწავლო წელი ახალციხის ამ 6 სკოლაში 227–მა მეთორმეტეკლასელმა დაამთავრა, ამ სასწავლო წელს კი 225 ახალგაზრდა დაამთავრებს.
სკოლებში სასწავლო წელი 14 სექტემბერს დაიწყება.

[თეონა თაბუნიძე, ნანა მიქელაძე, ახალციხე]