ვაჩიანის საბავშვო ბაღს გაფართოება სჭირდება

ვაჩიანის საბავშვო ბაღი, რომელიც 100 ბავშვზეა გათვლილი, ორი წელია მუშაობს. ბაღში 105 ბავშვი დადის, თუმცა ადგილის უქონლობის გამო ყველა მსურველის განცხადებას ვერ აკმაყოფილებენ.

ახალქალაქსა და მუნიციპალიტეტის სოფლებში საბავშვო ბაღებზე დიდი მოთხოვნაა, და ბავშვის ბაღში მიყვანის მსურველი მშობელიც ბევრია. თუმცა, ყველგან არიან მშობლები, ვისაც ბაღმა უარი უთხრა, იმ მოტივით, რომ გადავსებულია და ახალი აღსაზრდელებისთვის ადგილები არ აქვთ. ასეთი სიტუაციაა სოფელ ვაჩიანშიც.

საბავშვო ბაღი სოფელ ვაჩიანში 2011 წლის ნოემბერში გაიხსნა. ლიოვა მანუკიანმა, რომელიც ვაჩიანში გაიზარდა და ახლა რუსეთში ცხოვრობს, სოფელს საბავშვო ბაღისთვის საკუთარი სახლი დაუთმო.

ვაჩიანელების თქმით, საბავშვო ბაღი ბავშვებისთვის ძალიან მნიშვნელოვანია. ერთის მხრივ, პატარები რამდენიმე საათით სახლს სწყდებიან და მეორეს მხრივ, მშობლებს ხშირად არ აქვთ ბავშვების მეცადინეობის, მათთვის განათლების მიცემის დრო.

მშობლები, რომელთა განცხადებებიც არ დაკმაყოფილდა, უარის გამო უკმაყოფილებას გამოთქვამენ. სკოლამდელი აღზრდის დაწესებულების ადმინისტრაციაში კი აცხადებენ, რომ მათ უბრალოდ გამოსავალი არ აქვთ.

- „ახლა უკვე სკამებიც აღარაა საკმარისი. 10 ცალი არ გვყოფნის, თავიდან 96 ბავშვი გვყავდა, ახლა 105 პატარა დადის ჩვენთან. ბევრი მშობელი მოგვმართავს, მაგრამ ადგილები აღარ გვაქვს“, – ამბობს საბავშვო ბაღის დირექტორი ანნა მარგარიანი.

ახლახანს ძველ შენობას რამდენიმე ოთახი მიაშენეს, მაგრამ ეს ახალი ჯგუფის გახსნისთვის საკმარისი მაინც არ აღმოჩნდა. ბაღს დაემატა მხოლოდ სამი პატარა ოთახი, რომელთაგანაც ერთი ბავშვების საძინებელია, მეორის ხარჯზე ღონისძიებების დარბაზი გაფართოვდა, ხოლო მესამე, პატარა ოთახი დირექტორის კაბინეტისთვის გამოიყო.

[აღუნიკ აივაზიანი, ახალქალაქი]