აქციისთვის ახალციხეში საგანგებოდ არ ემზადებიან

დღეს „ნაციონალური მოძრაობის“ ახალციხის რიონულ ოფისში განსაკუთრებული ხალხმრავლობა არ იყო.

”დიდ საორგანიზაციო სამზადისში არ ვართ, ვფიქრობ, ეს შესამჩნევიცაა. ხალხი საკუთარი სურვილითა და ინიციატივით იკრიბება. ნაწილი საკუთარი მანანებით წავა, ნაწილი საზოგადოებრივი ტრანსპორტით“, - ამბობს „ერთიანი ნაციოანლური მოძრაობის“ ახალციხის ორგანიზაციის თავმჯდომარის მოვალეობის შემსრულებელი გელა დემეტრაძე.

მსუბუქი მანქანები, ავტობუსები და სამარშრუტო ტაქსები რომ არ იდგება ხვალ დილით „ნაციონალური მოძრაობის“ ოფისის წინ, ფრაქცია „ნაციონალური მოძრაობის“ თავმჯდომარე მაკა სუდაძეც საუბრობს: „ხვალინდელი დღე ერთგვარი ტესტია, ხალხმა გამოცდა უნდა ჩააბაროს თუ რამდენად გათავისუფლდა წნეხისგან“.

მისი თქმით, ეს აქცია არ იქნება პოლიტიკური ვნებით გამორჩეული: „აქ იქნება უბრალოდ დაფიქსირება პოზიციის ქვეყნის კურსთან დაკავშირებით“.

სუდაძე ფიქრობს, რომ სამცხე-ჯავახეთში მცხოვრები ხალხის ბუნებიდან გამომდინარე ხვალ აქციაზე ბევრი არ წავა: „არ წავლენ იმიტომ კი არა, რომ განწყობა არ არის ჩვენი მხარდაჭერის, უბრალოდ ბუნება აქვთ ისეთი, რომ აქციებზე სიარული და პოზიციის ასე გამოხატვა არ უყვართ“.

სუდაძე ვარაუდობს, რომ ხვალ აქციაზე ახალციხიდან მაქსუმუმ 200 კაცი წავა, რეგიონის მასშტაბით კი დაახლობით ხუთასი.

არ ემთხვევა ერთმანეთს დემეტრაძისა და სუდაძის მოლოდინი. გუბერნატორის მოადგილე ფიქრობს რომ ხვალ აქციაზე ახალციხიდან ასობით ადამიანი წავა, რეგიონიდან კი ათასზე მეტი.

„ნაციონალური მოძრაობის“ აქტივისტი მამუკა კურტანიძე ამბობს, რომ მობილიზება უკვე გაკეთებულია და ხვალ ახალციხიდან დაახლოებით 500 კაცი წავა: „მხოლოდ ერთი კორპუსიდან 15 კაცი მოდის და ვფიქრობ ეს ცოტა არაა“.

„ნაციონალების“ მხარდამჭერების რაოდენობის შესახებ წინასწარ პროგნოზის გაკეთება უჭირს არასამთავრობო ორგანიზაცია „დემოკრატ მესხთა კავშირის“ წარმომადგენლეს გია ანდღულაძეს.

”არ ვიცი რამდენი ადამინი წავა. მეგონა, მაჟორიტარი დეპუტატი იაქტიურებდა „ნაციონალებიდან“, მაგრამ როგორც თქვენი სტატიებიდან გავიგე, არ აქტიურობს“, - ამბობს ანდღულაძე და ამატებს, რომ ხვალ აქციაზე ძირიადად ისეთი ადამიანები წავლენ, რომლებმაც სამსახურები დაკარგეს და ხელისუფლების შეცვლის შემდეგ პრობლემები შეექმნათ.

გელა დემეტრაძე ამბობს, რომ არჩევნების შემდეგ მათი მხარდამჭერების რაოდენობა არ შემცირებულა: „ვფიქრობ ვერც წვიმიანი ამინდი შეგვიშლის ხელს, ვისაც წამოსვლა უნდა წამოვა“.

[თამუნა უჩიძე, ახალციხე]