გელა დემეტრაძე: 21 მარტს ახალციხიდან 2.000 კაცი წავა

21 მარტს, თბილისში „ერთიანი ნაციონალური მოძრაობის“ მიერ დაგეგმილ აქციას სამცხე – ჯავახეთიდანაც შეუერთდებიან. „ნაციონალური მოძრაობის“ახალციხის რაიონულ ოფიში აქციისთვის უკვე ემზადებიან.

„ერთიანი ნაციონალური მოძრაობის“ ახალციხის ორგანიზაციის თავმჯდომარე გელა დემეტრაძე ამბობს, რომ ახალციხიდან აქციაზე 2.000 კაცი წავა: „განსაკუთრებული მზადება არ გვჭირდება, ძალიან ბევრი თავისი სურვილით მოდის ჩვენს ოფისში და აქციაზე წასასვლელად ეწერება“.
გელა დემეტრაძე ამბობს, რომ აქციაზე „ნაციონალური მოძრაობის“ წარმომადგენლები და მხარდამჭერები საკუთარი ავტომანქანებითა და საზოგადოებრივი ტრანსპორტით წავლენ.

მისივე თქმით, თუ „ოცნების“ მხრიდან რაიმე პროვოკაციას ადგილი არ ჰქონდა, აქცია მშვიდობიანად ჩაივლის: „ჩვენ არ მივდივართ ავტომატებით და ხელკეტებით. ჩვენი მხრიდან პროვოკაციაზე საუბარი ზედმეტია თუ „ოცნების“ მხრიდან არ იქნა დაგეგმილი რაღაც მსგავსი ქმედებები“.

„აქციაზე მივდივართ იმის გამო, რომ მთავრობამ ჩვენი იმედები ვერ გაამართლა, არ არის არანაირი წინსვლა ქვეყანაში. მოვითხოვთ მთავრობის გადადგომას და იმედი გვაქვს, რომ ასეც იქნება“, – ამბობს "ერთიანი ნაციონალური მოძრაობის" ახალციხის ორგანიზაციის წევრი ნიკოლოზ ხიზაძე.

შეგახსენებთ, რომ „ერთიანი ნაციონალური მოძრაობა“ 21 მარტს, 16:00 საათზე, თბილისში აქციას მართავს. აქციის მონაწილეები ქვეყანაში არსებულ ეკონომიკურ კრიზისს გააპროტესტებენ და საქართველოს მთავრობის გადადგომას მოითხოვენ.

[მანანა სარაშვილი, ახალციხე]