ახალციხიდან თბილისისკენ 'ნაციონალური მოძრაობის' კოლონა დაიძრა

„ერთიანი ნაციონალური მოძრაობის“ წარმომადგენლები და მათი მხარდამჭერები საბარგო სადგურზე დღეს დილის 10:00 საათიდან შეიკრიბნენ. მათ ასპინძიდან მომავალი მხარდამჭერების ნაწილიც შეუერთდა.

აქციაზე მიმავალი ადგილობრივები ქვეყანში არსებულ მძიმე სოციალურ მდგომარეობას, პოლიტიკურ დევნასა და ქვეყნის განვითარების შეჩერებას აპროტესტებენ.

„ლარი გაუფასურდა, ცხოვრება გაძვირდა, ქვეყნის განვითარებაც შეჩერდა, წინ აღარაფერი მიდის. ამიტომ მივიდვართ აქციაზე, რომ ჩვენი პროტესტი დავაფიქსიროთ და მოვუწოდოთ მთავრობას გადადგეს“, – ამბობს ახალციხის მუნიციპალიტეტის სოფელ ბოგაში მცხოვრები ფრიდონ ყიფიანი.

ახალციხიდან აქციის მონაწილეები იმ განწყობით წავიდნენ, რომ ქვეყნის ხელისუფლებას გამოაფხიზლებენ და თუ არ გადადგებიან, ქვეყნის მშენებლობას მაინც დაიწყებენ.

„ალბათ გამოვაფხიზლებთ ამ ხელისუფლებას და თუ არ გამოფხიზლდებიან, მაშინ გადადგნენ და ადგილი დაუთმონ მათ, ვისაც ქვყენის შენება, განვითარება და მასზე ზრუნვა შეუძლია“, – ამბობს „ნაციონალური მოძრაობის“ ახალციხის რაიონული ორგანიზაციის თავმჯდომარე გელა დემეტრაძე.

მთავრობის გადადგომის მოთხოვნით მიდის აქციაზე ახალციხის მაჟორიტარი დეპუტატი ვაჟა ჩიტაშვილიც: „ორი წელია ზედიზედ ბიუჯეტის გარღვევაა, მეტი რაღა უნდა მოხდეს, მოვითხოვთ, რომ ეს მთავრობა გადადგეს“.

„ნაციონალური მოძრაობის“ წარმომადგენლები აცხადებენ, რომ აქციაზე გამგზავრების წინ მათთვის ხელი არავის შეუშლია და ზეწოლის მცდელობას ადგილი არ ჰქონია.







[თამუნა უჩიძე, ახალციხე]