გელა დემეტრაძე: სამცხე-ჯავახეთიდან, 15 ნოემბერს, აქციაზე 1500 კაცი წავა

რეგიონის მასშტაბით „ნაციონალური მოძრაობის“ ყველა რაიონული ოფისი, ბოლო დღეების განმავლობაში, აქციის ორგანიზებითაა დაკავებული.

„დღის განმავლობაში უამრავი ადამიანი გვაკითხავს, ვამზადებთ ტრანსფარანტებს“, - ამბობს "ნაციონალური მოძრაობის" ახალციხის რაიონული ორგანიზაციის თავმჯდომარე გელა დემეტრაძე.

რეგიონის მასშტაბით შტაბებს კოორდინირებას, სწორედ ახალციხის ოფისი უწევს.

„სამცხე-ჯავახეთიდან, საკმაოდ კარგი შემადგენლობით, დაახლოებით, 1500 კაცი წავა“, - ამბობს დემეტრაძე.

მისი თქმით,აქციაზე წასვლის მსურველი ბევრია: „ტრანსპორტის დაქირავების ხარჯები არ გვაქვს, ყველა თავისი ხარჯით მოდის. ასევე, ვცდილობთ მანქანებში, სადაც ადგილია ეს ხალხი გადავანაწილოთ და ვისაც წამოსვლა უნდა გული არ დავწყვიტოთ“.

აქციაზე წასვლის მსურველი რომ ბევრია, ამაზე ბორჯომში „ნაციონალური მოძრაობის“ რაიონული ორგანიზაციის თავმჯდომარე ვეფხია გრიგალაშვილიც საუბრობს: „ბევრი ბორჯომელი თბილისშია წასული და იქ შემოგვიერთდება. ბორჯომიდან დაახლოებით 100 კაცი წავალთ“.

ადიგენიდან 15 ნოემბრის საპროტესტო აქციაზე, „ნაციონალური მოძრაობის“ ადიგენის რაიონული ორგანიზაციის თავმჯდომარის, სიმონ პარუნაშვილის განცხადებით, დაახლოებით 300 კაცი გეგმავს წავლას.

„ბევრს ეშინია წამოსვლა, თუმცა, მათთვის არავის არაფერი უთქვამს, მუქარას, ან რაიმე მსგავსს ადგილი არ ჰქონია, თვითონ ფრთხილობენ, ეშინიათ სამსახური არ დაკარგონ, ან მათ ახლობლებს პრობლემები არ შეექმნათ“, - აცხადებს პარუნაშვილი.

ხელისშეშლის მცდელობა არც ბორჯომში ჰქონია არავის. მსგავსი ფაქტი არც ახალციხეში დაფიქსირებულა.

„სამარშრუტო ტაქსის მძღოლი აპირებდა წამოსვლას, მერე მოვიდა და უარი გვითხრა, რატომ არ ვიცით“, - ამბობს დემეტრაძე.

რაიონული ორგანიზაციების ხელმძღვანელების განცხადებით, „აქციაზე პომპეზურად გამგზავრება არ იგეგმება“: „არ იქნება კოლონა და შეძახილები. არ გვინდა ზედმეტი პრობლემები“.

მათი თქმით, 15 ნოემბრის საპროტესტო აქცია, უახლოეს დღეებში თუ არა, სამომავლოდ მაინც შედეგს გამოიღებს და საქართველოს ხელისუფლება რუსეთთან ლოიალურ პოლიტიკას შეცვლის.

[თამუნა უჩიძე, ახალციხე]