გელა დემეტრაძე: ”შავი სამყაროა” ჩართული, რომ ხალხი აქციაზე არ წავიდეს”

”ერთიანი ნაციონალური მოძრაობის” ახალციხის ორგანიზაციის თავმჯდომარის მოვალეობის შემსრულებლის და სამცხე-ჯავახეთში პრეზიდენტის რწმუნებულის მოადგილის გელა დემეტრაძის განცხადებით, პარტიის აქტივისტებს აშინებენ, რომ ხვალ ისინი აქციაზე არ წავიდნენ.

”ფაქტებით ამას ვერ დავადასტურებ. სამწუხაროა, რომ ამაში ჩართული შინაგან საქმეთა სამინისტროს თანამშრომლები არიან. გაფრთხილებული ჰყავთ ტაქსის მძღოლები, რომ ხვალ თბილისში წასვლა არ გაბედონ. ასევე, ცდილობენ ზეწოლას სამხარეო ადმინისტრაციის თანამშრომლებზე”, - აცხადებს დემეტრაძე.

მისივე განცხადებით, ”შავი სამყაროა” ჩართული, რომ ხალხი აქციაზე არ წავიდეს: ”არის მუქარა, რომ ფეხებს დაამტვრევენ ვინც თბილისში წავა. ამაზე ის ადამიანები, ვისაც დაემუქრნენ, არ ისაუბრებენ”.

დემეტრაძე ამბობს, რომ აღნიშნულის შესახებ ფაქტებით საუბარი გაუჭირდება და ამას ვერ დაადასტურებს, თუმცა, როგორც ახალციხელს ასეთი რამ განსაკუთრებით სწყინს: ”ეს ხალხი თუ იმისთვის გამოუშვეს, რომ მსგავსი ქმედებებისთვის სჭირდებათ, მაშინ კარგად ყოფილა ჩემი საქმე. პოლიტპატიმრებს და ზოგადად პატიმრებს ვგულისხმობ, ვინც ციხეები არჩევნების შემდეგ დატოვეს”.

”ნაციონალი” აქტივისტების დაშინებისა და გაფრთხილების შესახებ არასამთავრობო ორგანიზაცია ”დემოკრატ მესხთა” კავშირის წარმომადგენელი გიორგი ანდღულაძეც საუბრობს. თუმცა, ისევე როგორც დემეტრაძეს, მასაც კონკრეტული ფაქტების მოყვანა უჭირს და ამბობს, რომ არაოფიციალური ინფრომაცია აქვს კონკრეტული საუბრების შესახებ.

”მუქარასაც ვერ დავარქმევთ, ეს უფრო გაფრთხილებაა, თუმცა, როგორც ვიცი, ამაში ოფიციალური პირები არ მონაწილეობენ”, - ამბობს ანღულაძე.

ზეწოლების შესახებ ინფრომაციას კატეგორიულად უარყოფენ ახალცხიეში ფრაქცია ”ნაციონალური მოძრაობის” თავმჯდომარე მაკა სუდაძე და ამავე პარტიის აქტივისტი მამუკა კურტანიძე.
”დასამალი არაფერია და არც არავის მეშინია, მაგრამ ზეწოლა ნამდვილად არ არის”, - გვითხრა კურტანიძემ.

სუდაძის თქმით, ზეწოლა შეიძლება მასზე განხორციელდეს, ვისაც დამოუკიდებლობის დაბალი ხარისხი აქვს: ”ზეწოლები არ არის, არავინ არავის შეუშინებია. ეს მხოლოდ ხალხის უსაფუძვლო შიშია, რომ თუ მისი ახლობელი საჯარო სამსახურში მუშაობს და აქციაზე წავა, სამსახურიდან გაათავისუფლებენ”.

როგორც ”სამხრეთის კარიბჭესთან” ანონიმური რესპონდენტები აცხადებენ, ”ნაციონალი” აქტივისტების დაშინებას ყოფილი პატიმარი ვაჟა მაისურაძე ცდილობს.

მაისურაძე ბრალდებას კატეგორიულად უარყოფს და აცხადებს, რომ პოლიტიკასთან არანაირი კავშირი არ აქვს.

”გამორიცხულია, არავინ შემიშინებია, მითხარით ვინ თქვა და გნებავთ მასთან ერთად ვისაუბროთ. მსგავსი საუბარი არავისთან მქონია”, - გვითხრა მაისურაძემ, რომელმაც ციხე 7 წლის შემდეგ, მიმდინარე წლის თებერვალში დატოვა.

[თამუნა უჩიძე, ახალციხე]