”ნაციონალების” თავმჯდომარე: ვერულაშვილი და ახალია ”ოცნებასთან” არიან გარიგებული

ფრაქცია ”ნაციონალური მოძრაობის” თავმჯდომარე ახალციხეში მაკა სუდაძე აცხადებს, რომ ბოლო დროს ”ნაციონალებიდან” წასული უმცირესობის წარმომადგენლების განცხადებები პარტიის ყველაზე უფრო მაღალრეიტინგული წევრის, ვანო მერაბიშვილის მისამართითაა გაკეთებული.

სუდაძე ფიქრობს, რომ ასეთი ქმედებებით პარტიას ვერაფერს დააკლებენ, რადგან ”ნაციონალური” მოძრაობა კარგად შეკრული გუნდია: ” სხვა რამ მაშინებს, თუ ახალია და ვერულაშვილი ფლობდნენ მსგავსი სახის ინფორმაციებს და ამდენი ხნის განმავლობაში მალავდნენ, ეს დანაშაულია პარტიისა და ხალხის წინაშე. ვფიქრობ, რომ ეს ადამიანები ახლა პასუხს უნდა აგებდნენ თავიანთ განცხადებებზე”.

სუდაძე აცხადებს, რომ იცავს უდანაშაულობის პრეზუმფციას, თუმცა, ფიქრობს, რომ აქვს უფლება გამოთქვას ვარაუდი, რომ ახალია და ვერულაშვილი გარიგებაში არიან ”ქართულ ოცნებასთან”: ”ვფიქრობ, მათი განცხადებები არ დადასტურდება, თუმცა ეს ყველაფერი იმოქმედებს ხალხის ფსიქიკაზე”.

კითხვაზე რატომ ცდილობენ თანაპარტიელები თავიანთი ”ხერხემლის” წინააღმდეგ განცხადებების გაკეთებას, ”ერთიანი ნაციოანლური მოძრაობის” ახალციხის ორგანიზაციის თავმჯდომარის მოვალეობის შემსრულებელი გელა დემეტრაძე გვპასუხობს: ”ცუდას რად უნდა მტერობა, კარგია მუდამ მტრიანი”.

ადგილობრივი არასამთავრობო ორგანიზაციის ”დემოკრატ მესხთა კავშირის” წარმომადგენელს გიორგი ანდღულაძეს უჭირს ივარაუდოს, რა მიზნით კეთდება ბოლო დროს ”ნაციონალური მოძარაობის” წინააღმდეგ ასეთი განცხადებები: ”ამის გასარვევად დროა საჭირო. რაღაც რომ ხდება პარტიაში, აშკარაა, მაგრამ რა ხდება, ნამდვილად არ ვიცი. რაც შეეხება პარტიის შესუსტებას, ვფიქრობ დადგა დრო, რომ წავიდეს პარტიიდან ყველა ის ადამიანი, ვისაც სხვა პოზიციები აქვს”.

ანდღულაძე და სუდაძე ფიქრობენ, რომ ბოლო დროს გაკეთებული განცხადებები 19 აპრილს დაგეგმილ აქციას საეჭვოდ ემთხვევა. თუმცა ფიქრობენ, რომ იმას ვინც აქციაზე წასვლას გეგმავს, ეს ხელს არაფერში შეუშლის.

[თამუნა უჩიძე, ახალციხე]