გელა დემეტრაძე: ხალხის ნდობა არ დაგვიკარგავს

„ერთიანი ნაციონალური მოძრაობის“ ახალციხის რაიონული ორგანიზაციის ხელმძღვანელი ამბობს, რომ 27 ოქტობრეს ადგილი ჰქონდა ადმინისტრაციული რესურსის გამოყენებას. თითქმის ყველა საარჩევნო უბანთან ტერიტორიული ორგანოს რწმუნებულები იმყოფებოდნენ და აგიტაციას ეწეოდნენ, თუმცა "ნაციონალური მოძრაობის" წარმომომადგენლების გამოჩენისთანავე უბანს ტოვებდნენ.

„გაყალბების შესახებ აშკარა სიგნალი არ მოგვსვლია, თუმცა „ქართულ ოცნებას“ ყველა პირობა ჰქონდა შექმნილი იმისთვის, რომ ნებისმიერ უბანზე, ნებისმიერი შედეგი დაედო. ვგულისხმობ იმას, რომ საარჩევნო კომისიები უმეტესად მათი წარმომადგენლებით დაკომპლექტდა“, - ამბობს გელა დემეტრაძე.

მისივე თქმით, ახალციხის მუნიციპალიტეტში ყოველმა მესამე ამომრჩეველმა მხარი „ერთიანი ნაციონალური მოძრაობის“ საპრეზიდენტო კანდიდატს დავით ბაქრაძეს დაუჭირა. გელა დემეტრაძე ამბობს, რომ ეს მათ პარტიას მომავალში ბრძოლის გაგრძელების სტიმულს აძლევს.

„იმ სიტუაციის შემდეგ, რაც საპარლამენტო არჩევნების შემდეგ იყო, ვფიქრობ, რომ კარგი შედეგი მივიღეთ. მოსახლეობა დღე და ღამე ჩვენს ლანძღვას ისმენდა, მაგრამ ამ ფონზე ყოველმა მესამე ამომრჩეველმა მხარი დაგვიჭირა. ვფიქრობ, რომ ხალხში ნდობა არ დაგვიკარგავს და მათ ახსოვთ ის სიკეთე, რაც ჩვენ გაგვიკეთებია“, - ამბობს გელა დემეტრაძე და ამატებს, რომ მიუხედავად არჩევნების შედეგებისა „ერთიანი ნაციონალური მოძრაობა“ ბრძოლას განაგრძობს და მომავალი ადგილობრივი თვითმმართველობის არჩევნებისთვის აქტიურად მოემზადება.

[sknews.ge]