ახალციხის თემში „ნაციონალების“ ფრაქციას სხვა შემადგენლობით არეგისტრირებენ

დღეს, 6 თებერვალს ახალციხის თემის საკრებულოში „ნაციოანლების“ ფრაქციას არეგისტრირებენ. ახლად შექმნილ ფრაქციაში ოთხი წევრი იქნება: კობა სანდროშვილი, ტარიელ ტაბატაძე, გიორგი ბლიაძე და კობა ბუხრიკიძე. ფრაქციის თავმჯდომარედ კი ტარიელ ტაბატაძე უკვე აირჩიეს და ახლა განცხადება კანცელარიაში შეაქვთ.

ახალციხის თემში „ნაციონალურ მოძრაობას“ ორი ფრაქცია ჰქონდა: „ნაციონალები“ და „ქრისტიან–კონსერვატორები“.

აქამდე „ნაციონალების“ ფრაქციას მაკა სუდაძე თავმდჯომარეობდა, წევრები კი იყვნენ ამირან ბუხრიკიძე, კობა სანდროშვილი და კახაბერ მოდებაძე.

„ქრისტიან–კონსერვატორების“ თავმჯდომარე კი ირინა გელაშვილი იყო. მის ფრაქციაში რობერტ მურადიანი, გიორგი ბლიაძე და ტარიელ ტაბატაძე ირიცხებოდნენ.

მოცემული ვითარებიდან გამომდინარე „ნაციონალების“ ფრაქციაში აღარ იქნებიან ირინე გელაშვილი, მაკა სუდაძე, რობერტ მურადიანი და კახაბერ მოდებაძე. სავარაუდოდ, ყველა მათგანი ახალ პარტიაში „ევროპულ საქართველოში“ გადავიდა.

„ჩვენ ყველა ახალ პარტიაში ვართ და სახელს შევიცვლით, თუმცა საბოლოოდ შეთანხმებულები მაინც არ ვართ“, – ამბობს მაკა სუდაძე.

შეგახსენებთ რომ „ნაციონალური“ მოძრაობიდან წასული წევრების ნაწილმა ახალი პარტია „მოძრაობა თავისუფლებისთვის – ევროპული საქართველო“ 30 იანვარს დააფუძნა. მას შემდეგ კი მუნიციპალიტეტების საკრებულოებში ფრაქციების ნაწილი დაიშალა.

[თამუნა უჩიძე, ახალციხე]