ახალციხელები ქვეყნის საგარეო კურსის შესახებ

არასამთავრობო ორგანიზაციების წარმომადგენლები საქართველოს საგარეო პოლიტიკური კურსის ცვლილების საფრთხეზე საუბრობენ და მთავრობისადმი სპეციალურ მიმართვას ავრცელებენ.

აღნიშნული საფრთხე მათ ბიძინა ივანიშვილის მიერ სომხეთში გაკეთებული განცხადების შემდეგ დაინახეს, როდესაც პრემიერმა აღნიშნა, რომ სომხეთი საქართველოსთვის შესაძლოა, კარგი მაგალითი იყოს ქვეყნისა, რომელსაც კარგი ურთიერთობები აქვს როგორც რუსეთთან, ასევე ნატო-ს წევრ სახელმწიფოებთან.

ადგილობრივი არასამთავრობო ორგანიზაცია “დემოკრატ მესხთა კავშირის” წარმომადგენელი გიორგი ანდღულაძე ამბობს, რომ არსებული ხელისუფლების საგარეო პოლიტიკა რადიკალურად განსხვავებულია წინა ხელისუფლების საგარეო პოლიტიკისაგან. მიუხედავად ამისა ერთმნიშვნელოვნად არ შეიძლება ითქვას, რომ პოლიტიკური კურსი იცვლება და საქართველო რუსეთისკენ მიდის. ანდღულაძე მიიჩნევს, რომ საჭიროა საზოგადოების მეტი ინფორმირება ხელისუფლების მხრიდან, როგორც საგარეო პოლიტიკის, ასევე მიმდინარე პროცესების შესახებ, რათა საზოგადოებას აღარ ჰქონდეს ეჭვების საფუძველი.

ასევე ადგილობრივი არასამთავრობო ორგანიზაცია ”ტოლერანტის” თავმჯდომარის ცირა მესხიშვილის თქმით, პრემიერისა და საგარეო საქმეთა მინისტრის განცხადებებით, საქართველოს საგარეო პოლიტიკური კურსი უცვლელია: ”ამაზე მეტყველებს ბოლო დროს მიღებული რეზოლუციაც, რომელშიც სიტყვა ოკუპაცია ისევე ჩაიწერა, როგორც ეს აქამდე ეწერა”.

მესხიშვილი ფიქრობს, რომ იმ განცხადებების ფონზე, რომლებიც ბოლო დროს კეთდება მთავრობის წარმომადგენლების მხრიდან, ძნელია დააბრალო მათ კურსის ცვლილება: ”ვერ იტყვი ერთს ამბობენ და გულში მეორეს ფიქრობენო. თუ ამგვარ საფრთხეს დავინახავ, როგორც საქართველოს მოქალაქე, ამას ხმამაღლა აუცილებლად ვიტყვი”.

საქართველოს საგარეო პოლიტიკური კურისის ცვლილების საფრთხეს ვერ ხედავს ახალციხელი ნუგზარ თათეშვილიც: ”ამის არცერთი სიმპტომი არ არსებობს. ეს მხოლოდ მოწინააღმდეგე მხარის სურვილია რომ ამაზე ილაპარაკონ, თორემ ამ მხრივ არანაირი ცვლილება არ გველოდება”.
მისივე თქმით, თუ გაუმჯობესდება დამოკიდებულება ყველა მეზობელთან,
თურქეთი იქნება, ეს აზერბაიჯანი, სომხეთი თუ რუსეთი, ნატოსთან და ევროკავშირთან მეგობრობა კიდევ უფრო გაგვიმარტივდება: ”ნატო და ევროკავშირი ყოველთვის მიგვითითებდა, რომ მოგვეწესრიგებინა ურთიერთობა რუსეთთან”.

ფრაქცია ”ნაციონალების” თავმჯდომარე მაკა სუდაძე აცხადებს, რომ ბოლო დროს განვითარებული მოვლენები აჩენს საფუძველს საგარეო კურსის ცვლილების შესახებ ვივარაუდოთ: ”დანამდვილებით ვერ ვიტყვი, რომ საგარეო კურსის ცვლილება ნათლად ჩანს”.

[თამუნა უჩიძე, ახალციხე]