დაბა წაღვერში საგანგებო შტაბის სხდომა იმართება

სხდომას საქართველოს შინაგან საქმეთა, რეგიონული განვითარებისა და გარემოს დაცვის სამინისტროების, კრიზისების მართვის საბჭოს, ასევე, სახანძრო-სამაშველო სამსახურების წარმომადგენლები, ბორჯომის გამგებელი და სამცხე-ჯავახეთის გუბერნატორი ესწრებიან.

შეხვედრაზე ხანძრის სალიკვიდაციო გეგმას განიხილავენ, ვითარებას შეაჯამებენ და სამოქმედო გეგმას დასახავენ.

საქართველოს პრემიერის განცხადებით, ამ ეტაპზე მოსახლეობის ევაკუაციის საჭიროება არ დგას. მისივე თქმით, ხვალიდან ცეცხლის ჩაქრობაში თურქეთიდან ორი და აზერბაიჯანიდან კიდევ ერთი ვარტმფრენი ჩაერთვება.

ამ დროისათვის ხანძარი დაბასთან ხუთას მეტრში ჩამოვიდა. მოსახლეობა გარეთაა გამოსული და დახარებას ითხოვს. ერთმა ოჯახმა თავისი გადაწყვეტილებით საცხოვრებელი დატოვა.

შეგახსენებთ, ბორჯომში ხანძარი უკვე მეორე დღეა მძვინვარებს. ცეცხლი 20 აგვისტოს, შუადღეს გაჩნდა. თავდაპირველად ერთი ჰექტარი იწვოდა, დღეს საღამოს ცეცხლი უკვე 5 ჰექტარზე იყო მოდებული. რა ფართობი იწვის ამ დროისათვის [21 აგვისტო, 00:39 სთ], ამ ეტაპზე გარემოს დაცვის სამინისტროში ვერ აკონკრეტებენ, საუბარია 10 ჰექტრამდე ტერიტორიაზე.

ასევე, შეგახსენებთ, დღეს, შუადღეს, ცეცხლის ლოკალიზება შეძლეს, მაგრამ, საღამოს, ძლიერი ქარის გამო ისევ გაძლიერდა.

სამცხე-ჯავახეთში, ბორჯომის რაიონის, სოფელ დაბის ტერიტორიაზე, ის ტერიტორია იწვის, რომელიც 2008 წლის რუსეთ-საქართველოს ომის დროს გადაიწვა.

ადგილზე მთელი დღის განმავლობაშ მუშაობდა 270 მეხანძრე მაშველი, მოხალისეები და ორი ვერტმფრენი. ამ წუთებში ბორჯომში მძიმე ტექნიკა საქართველოს სხვა რეგიონებიდან მიემართება. ხანძრის ჩაქრობას ქარი და მიუვალი ადგილები აფერხებს.

[sknews.ge]