ბორჯომში ხანძრის ახალი კერები გაჩნდა [Photo/Video]

ეროვნული სატყეო სააგენტოს ხელმძღვანელის თორნიკე გვაზავას განმარტებით, ამ ეტაპზე ბორჯომში ცეცხლი 5 ჰექტარზეა გავრცელებული: „ქარი ამოვარდა და ახალი კერები წარმოშვა, ახალ ფართობზე არ გადასულა, ხანძარი იქ გაძლიერდა, სადაც მანამდე ლოკალიზებული იყო. 10–12 სახანძრო მანქანა რჩება, დახმარებას ველოდებით მეზობელი ქვეყნიდანაც“.

სტიქიის ზონაში იმყოფება ბორჯომის მუნიციპალიტეტის გამგებლის მოადგილე ანზორ სვანიძეც. მისი თქმით, ამ ეტაპზე დამატებითი ძალების მობილიზება საჭირო არ არის: „ორი დღეა ვერტმფრენი მუშაობს, ცოცხალი ძალა საკმარისია, ბევრს აქვს სურვილი დახმარების, თუმცა, ამ ეტაპზე, საჭიროება არ დგას. ყვიბისის მხარეს, იქ სადაც მანქანების მისვლის საშუალება იყო, ხანძარი ლოკალიზებულია, ამ ეტაპზე ცეცხლის კერები რჩება დაბის ტერიტორიაზე, აქ ცეცხლი ქარის გამო გაძლიერდა“.



ბორჯომში ხანძრის ჩაქრობას ცდილობს 200-მდე მეხანძრე-მაშველი. სამუშაოებში ჩართულია სასაზღვრო პოლიციის ვერტმფრენი. საქართველოს დასახმარებლად პრეზიდენტ ილჰამ ალიევის განკარგულებით, ვერტმფრენი გამოგზავნა აზერბაიჯანმაც.

შეგახსენებთ, რომ ბორჯომში სოფელ დაბას მიმდებარე ტერიტორიაზე ხანძარი გუშინ, 20 აგვისტოს გაჩნდა. ხანძრის გაჩენის სავარაუდო მიზეზად მაღალი ტემპერატურა და მოსახლეობის დაუდევრობა სახელდება.


















[თინათინ ზაზაძე, ბორჯომი]