გარემოს დაცვის სამინისტროს განცხადება ბორჯომის ხანძარზე

საქართველოს გარემოსა და ბუნებრივი რესურსების დაცვის სამინისტროში აცხადებენ, რომ ადგილზე მობილიზებულია შესაბამისი ტექნიკა, შექმნილია საგანგებო შტაბი, რომელშიც შედიან გარემოსა და ბუნებრივი რესურსების დაცვის სამინისტროს ეროვნული სატყეო სააგენტოს, შინაგან საქმეთა სამინისტროს საგანგებო სიტუაციების დეპარტამენტის, სამაშველო სამსახურისა და მუნიციპალიტეტის წარმომადგენლები.

„სალიკვიდაციო სამუშაოებში აქტიურადაა ჩართული ადგილობრივი მოსახლეობაც. ამ დროისათვის 2 ვეტმფრენის მეშვეობით, ხანძარი ლოკალიზებულია და მიმდინარეობს მისი ლიკვიდირება“, – აცხადებენ სამინისტროში.

შეგახსენებთ, გუშინ, 30 ივლისს, შუადღეს, ბორჯომის მუნიციპალიტეტის სოფელ დვირის მიმდებარე ტერიტორიაზე, ტყის მასივს ცეცხლი გაუჩნდა. ადგილზე მთელი ღამის განმავლობაში მობილიზებული იყო 20 სახანძრო-სამაშველო ერთეული და 150-ზე მეტი მეხანძრე-მაშველი ბორჯომიდან და ასევე საქართველოს სხვადასხვა რეგიონებიდან. ხანძრის სალიკვიდაციო ოპერაციაში ჩართული იყო სასაზღვრო პოლიციის დეპარტამენტის ორი ვერტმფრენი.

ხანძრის შედეგად არავინ დაშავებულა.

[sknews.ge]