ბორჯომის ტყეში ხანძარი ლოკალიზებულია

შინაგან საქმეთა სამინისტროს საგანგებო სიტუაციების მართვის სააგანტოს ინფორმაციით, ბორჯომის მუნიციპალიტეტის სოფელ დვირში დაახლოებით ხანძრის შედეგად დაახლოებით 6 ჰექტარი ტყის მასივი დაიწვა.

სამცხე–ჯავახეთის გუბერნატორის თქმით, ამ ეტაპზე ხანძარი ლოკალიზებულია, თუმცა ლიკვიდირებული არ არის. როგორც აკაკი მაჭუტაძე განმარტავს, ხანძრის დასახლებულ პუნქტებში გავრცელების საფრთხე არ არსებობს.

"ცეცხლის გამომწვევი მიზეზები უცნობია, მიმდინარეობს ფაქტის გამოძიება", – განაცხადა აკაკი მაჭუტაძემ.

ხანძარი ბორჯომის ტყეში გუშინ, შუადღეს გაჩნდა. ადგილზე მთელი ღამის განმავლობაში მობილიზებული იყო 20 სახანძრო-სამაშველო ერთეული და 150-ზე მეტი მეხანძრე-მაშველი ბორჯომისა და საქართველოს სხვადასხვა რეგიონებიდან. ხანძრის სალიკვიდაციო ოპერაციაში ჩართული იყო სასაზღვრო პოლიციის დეპარტამენტის ორი ვერტმფრენი.

ხანძრის შედეგად არავინ დაშავებულა.

[თამარ თოთაძე, ბორჯომი]