ბორჯომის ხეობაში ავიაციამ მუშაობა დილამდე შეაჩერა

ბოლო ინფორმაციით, ამ ეტაპზე რთული კერები რჩება წაღვერში, სადაც ძლიერი ქარიცაა. ამ დროისათვის სამაშველო სამუშაოები წაღვერში მიმდიანარებს.


ამ დრომდე ბორჯომში იმყოფებიან მთავრობის წევრები, მუშაობას აგრძელებს საგანგებო შტაბიც. შტაბის წევრები ახლა საგანგებო თათბირისთვის ემზადებიან, რომელზეც დღეს ჩატარებულ სამუშაოებსა და შედეგებს განიხილავენ და ღამის სამოქმედო გეგმას დასახავენ. როგორც შტაბში აცხადებენ, დილიდან მუშაობას კვლავ განაახლებს ავიაცია.

შეგახსენებთ, 20 აგვისტოდან ბორჯომში ხანძარს ებრძვიან. თავდაპირველად ცეცხლი ნახევარ ჰექტარზე იყო მოდებული. 21 აგვისტოს, ხანძრის მასშტაბი გაიზარდა, საქმეში საქართველოს სასაზღვრო ძალების ვერტმფრენი ჩაერთო, თუმცა, ხანძრის ლოკალიზება გაართულა მიუდგომელმა ადგილებმა და ქარმა.

23 აგვისტოს მონაცემებით, სტიქიის ზონაში 8 ვერტმფრენი და 1 თვითმფრივანი მუშაობს. სამაშველო სამუშაოებში ჩართულია თურქეთის, აზერბაიჯანისა და ბელარუსის ავიაცია, ასევე, მეხანძრე–მაშველები და სახანძრო ტექნიკა სომხეთიდან და აზერბაიჯანიდან.

რა ფართობი განადგურდა ხანძრის შედეგად, ამ ეტაპზე უცნობია, ისევე, როგორც ხანძრის გამომწვევი მიზეზი და ზარალის ოდენობა.

[sknews.ge]