საბარგოზე საკანალიზაციო ქსელის მშენებელი ტენდერში 10 დღით გვიან გამოვლინდება

საბარგო სადგურზე საკანალიზაციო ქსელის მშენებლობისთვის ტენდერში გამარჯვებული 25 ივლისს შემდეგ გამოვლინდება.

ტენდერში მონაწილეობა შვიდმა კომპანიამ მიიღო: შპს "B&B", შპს "მეოხი", შპს "ალიანსი", შპს "ვი–აი–პი +", შპს "ნიუ ქონსთრაქშენ ტექნოლოჯი" , შპს "ადმირალ 2012", შპს "კავკასენერგო". ტენდერში მონაწილე კომპანიების სიმრავლიდან გამომდინარე, შემსყიდველ კომპანიას მათი სატენდერო დოკუმენტების შესასწავლად და დასკვნის დასაწერად დამატებით 10 დღის ვადა სჭირდება. ამიტომ საქართველოს "გაერთიანებული წყალმომრაგების კომპანიაში" სატენდერო კომისიამ 11 ივლისის ნაცვალად ეს ვადა 25 ივლისამდე გადაწია. (ოქმი N2. 18/07.2017).

სატენდერო დოკუმენტების მიხედვით, შესყიდვის ობიექტის სავარაუდო ღირებულება 1 076 573 ლარია. საბარგო სადგურზე სამშენებლო სამუშაოები, გამარჯვებულ კომპანიასთან ხელშეკრულების გაფორმებიდან არაუმეტეს ხუთ თვეში დასრულდება.

შესრულებული სამუშაოების საგარანტიო ვადად კი არანაკლებ 1 წელია მითითებული, თუმცა ეს ვადა საბოლოო მიღება–ჩაბარების აქტის გაფორმებიდან აითვლება.

შეგახსენებთ, ახალციხეში, საბარგო სადგურზე მცხოვრებლები წლებია დასახლებაში საკანალიზაციო ქსელი მოწყობას ითხოვენ. მათ პროტესტის უკიდურეს ფორმას მიმართეს და ახალციხის შემოსასვლელში თბილისი – ახალციხის ცენტრალური მაგისტრალი გადაკეტეს. აქ საკანალიზაციო ქსელის მოწყობაზე მთავრობამ გადაწყვეტილება სწორედ ამის შემდეგ მიიღო.

[თამუნა უჩიძე, ახალციხე]