ახალციხის საავადმყოფოდან თანამშრომლები ისევ შეამცირეს

საავადმყოფო ამჯერად დამხმარე პერსონალმა დატოვა. სამედიცინო დაწესებულების ადმინისტრაციაში თანამშრომლების გათავისუფლების მიზეზად ხელშეკრულებით დადგენილი ვადის ამოწურვას ასახელებენ.

”უნიმედი სამცხეს” ახალციხის სამედიცინო დაწესებულების დირექტორი ვლადიმერ გელაშვილი ამბობს, რომ საავადმყოფოში საკმარისი რაოდენობის დამხმარე პერსონალი (სანიტარი) დარჩა: ”საავადმყოფოში 30 ზე მეტი დამხმარე პერსონალი აგრძელებს მუშაობას”.

”უნიმედი სამცხეს” სამედიცინო დაწესებულების თანამშრომლები კი პირად საუბრებში ამბობენ, რომ დარჩენილი დამხმარე პერსონალი საკმარისი არ არის. იმის გამო, რომ პრესასთან საუბარი ეკრძალებათ, ისინი საჯარო კომენტარისგან თავს იკავებენ.

”ძალიან ცუდ დღეში ვართ, მთლიანი სართულის დალაგება მარტო მიწევს. ამბობენ კიდევ უნდა შეგვამცირონ, რადგან ღამე სანიტრები აღარ არის საჭირო და მარტო დღე უნდა იმუშაოთო. ღამე რომ შემოდის პაციენტი, მარტო ექთანმა როგორ უნდა შეძლოს ყველაფერი?”-კითხულობს ერთ-ერთი თანამშრომელი.

შეგახსენებთ, რომ მედ-პერსონალის ხელშეკრულებებს ვადა მიმდინარე წლის 15 აპრილს ამოეწურა. თანამშრომელთა ნაწილს დღეს ახალი, ექვსთვიანი ხელშეკრულებები გაუფორმეს. ექიმები ამბობენ, რომ ხელშეკრულებას ხელი ისე მოაწერეს, პირობებს არ გასცნობიან.

”დღეს ბოლო დღე იყო, თითქმის არავინ გაცნობია რა ეწერა ხელშეკრულებაში. ბრმად მოვაწერეთ და წამოვედით”, - გვეუბნება სამდიცინო დაწესებულების ერთერთი თანამშრომელი.

შეგახსენებთ, ეს სამედიცინო ცენტრიდან მედ-პერსონალის გათავისუფლების პირველი შემთხვევა არ არის. ახალციხის საავადმყოფოში პრობლემები მას შემდეგ დაიწყო, რაც იგი ”ალდაგი ბისიაის” შვილობილი კომპანიის, ”ჩემი ოჯახის კლინიკის” მფლობელობაში გადავიდა. თავდაპირველად დაწესებულებიდან უბნის ექიმები და ექთნები გაათავისუფლეს. იმის გამო, რომ ანაზღაურების სისტემა შეიცვლა და ხელფასები მიზერული გახდა, საავადმყოფოს ექიმების ნაწილი საკუთარი ნებითაც ტოვებს.

ყოფილი ახალციხის რაიონული საავადმყოფო ”ალდაგი ბისიაის” შვილობის კომპანიას 2012 წლის 1 სექტემბერს, სიმბოლურ ფასად, 1 ლარად გადაეცა. აქვე შეგახსენებთ, რომ ახალციხის სამედიცინო დაწესებულება ”უნიმედი-სამცხე” ერთ-ერთია იმ 1550 საავადმყოფოს შორის, რომლის საკითხსაც სამთავრობო კომისია სწავლობს.

[თინათინ ზაზაძე, ახალციხე]