ახალციხის საავადმყოფოს ექიმები ტოვებენ

15 აპრილს საავადმყოფოს თანამშრომლებს ხელშეკრულების ვადა შეუწყდათ. ახალ ხელშეკრულებაზე ხელი ქირურგმა გოგი გოგოტიშვილმა, აღარ მოაწერა.

”მუშოაბა იმ კომპანიასთან, რომელიც საავადმყოფოში შემოვიდა პრაქტიკულად შეუძლებელია. არ ვიყავი თანახმა მემუშავა იმ პირობებში რომელსაც კლინიკის მფლობელი გვთავაზობდა”, - აცხადებს ყოფილი ექიმი და ამატებს, რომ ანაზღაურება, ასევე ხელმძღვანელების ტონი, მათი გონორით საუბარი და საავადმყოფოში შექმნილი ვითარება მისთვის მიუღებელი იყო.

გოგოტიშვილი თბილისიდან ახალციხეში სამუშაოდ 5 წლის წინ გადმოვიდა. მან ახალციხე უკვე დატოვა და როგროც”სამხრეთის კარიბჭესთან” სატელეფონო საუბარში განაცხადა უკვე მუშაობაც დაიწყო: ”თბილისში პირველ საავადმყოფოში ქირურგიული განყოფილების უფროსად დავინიშნე”.

მისი თქმით, საავადმყოფოს დატოვებას ათობით ექიმი აპირებს.

”ჯერ არ ვიცი რას ვიზამ, შესაძლოა სამსახურიდან წავიდე”, - აცხადებს
რეანიმაცია-ანესთეზიოლოგიის განყოფილების გამგე ამბროსი მოდებაძე.

მოდებაძე ფიქრობს, რომ შესაძლოა შრომის ახალი კანონის ძალაში შესვლის შემდეგ სასამართლოსაც მიმართოს. მოდებაძე იმ ორი თვის ანაზღაურებას მოითხოვს, რომელიც საავადმყოფოს მფლობელ კომპანიას მისთვის უნდა გადაეხადა: მას შემდეგ რაც ახალციხის საავადმყოფოში ”ალდაგის” შვილობილი კომპანია ”ჩემი ოჯახის კლინიკა” შევიდა ახალმა ხელმძღვანელობამ მედ პერსონალთან შრომითი ხელშეკრულებები 6-თვიანი ვადით 15 სექტემბერს გააფორმა. მის თანახმად საავადმყოფოს თანამშრომლები ანაზღაურებას ბოლო ერთი წლის განმავლობაში მიღებული ხელფასის საშუალო ოდენობით აიღებდნენ. რადგან შეთავაზება მისაღები იყო, ექიმებმა ხელშეკრულებას ხელი მოაწერეს. თუმცა, ხელშეკრულების ვადის გასვლამდე, პირველ დეკემბერს თანამშრომლებს ხელის მოწერა ახალ შრომით ხელშეკრულებაზე მოსთხოვეს. მას ხელი ექიმებმა 13 თებერვლამდე არ მოაწერეს, თუმცა ანაზღაურებას სწორედ ხელმოუწერელი ხელშეკრულების პირობების მიხედვით იღებდნენ.

სასამართლოს მიმართავს თუ სამსახურს იურიდიული გარჩევების გარეშე დატოვეს ჯერ გადაწყვეტილი არც ქირურგ პავლე პეტაშვილს აქვს: ”ორი დღე გვაქვს ვადა ხელშეკრულებაზე ხელისმოწერამდე, ჯერ ზუსტად არ ვიცი როგორ მოვიქცევი”.

[თამუნა უჩიძე, ახალციხე]