”უნიმედი სამცხეს” მედ-პერსონალი ტოვებს

მაია ზაზაძემ სამსახურიდან წასვლის განცხადება 27 დეკემბერს, 12 საათზე ”უნიმედი სამცხეს” ხელმძღვანელის სახელზე დაწერა. ზაზაძის მოთხოვნა საავადმყოფოს ხელმძღვანელობამ იმ დღესვე დააკმაყოფილა.

”წასვლა დაბალი ხელფასის გამო გადავწყვიტე. აქამდე 128 ლარი გვქონდა და ახლა 50 ლარი დაგვიტოვეს, 31 დეკემბერსაც ვიმორიგევებ და წავალ. საქმე მეტი გვაქვს, ანაზღაურება ცოტა. მიზერულ თანხად არ მიღირს ამხელა განყოფლების დალაგება, გარდა ამისა, ”პერედაჩებიც” ჩვენ უნდა ვზიდოთ და მშობიარეებსაც ღამე ვუთიოთ”,- ამბობს იგი.

დაბალი ხელფასის გამო დატოვა სამსახური ხატია თუმანიშვილმაც. თუმანიშვილმა განცხადება, დეკემბრის დასაწყისში დაწერა.

”სწავლის გაგრძელებას ვაპირებ და სამსახურიდან ამიტომ წამოვედი, თუმცა გადაწყვეტილების მიღებაზე ხელფასის შემცირებამ მნიშვნელოვნად იმოქმედა”, - ამბობს იგი.

სამშობიარო განყოფილებაში ამბობენ, რომ სამსახურიდან წასვლას სხვა თანამშრომლებიც გეგმავენ.

”ისეთ პირობებს გვიქმნიან, ჩვენი ნებით მივდივართ. ვის უნდა მივმართოთ? ყველგან ასეთი სიტაციაა. რაც არ უნდა გავაკეთოთ, აზრი არ აქვს, ყველაფერი “ზემოდან” წყდება”, - აცხადებენ თანამშრომლები.

შეგახსენებთ, რომ ხელფასების შემცირება და საკადრო ცვლილებები მას შემდეგ დაიწყო, რაც ახალციხის რაიონული საავადმყოფო სადაზღვევო კომპანია ”ალდაგი ბისიაის” შვილობილი კომპანიის ’”ჩემი ოჯახის კლინიკის” მმართველობაში გადავიდა.

თუ აქამდე მედპერსონალი ანაზღაურებას შესრულებული სამუშაოს მიხედვით ღებულობდა, ახლა მათი თქმით, მიუხედავად იმისა ბევრს იმუშავებენ თუ ცოტას, ხელფასს მაინც უცვლელი რაოდენობით, ფიქსირებულს მიიღებენ. ფიქსირებული ხელფასი კი საავადმყოფოს თანამშრომლების თქმით, ხელმძღვანელებმა არასწორად გაანაწილეს.

შეგახსენებთ, რომ ”უნიმედი სამცხემ” 30 ნოემბერს ყოფილი პოლიკლინიკის 14 თანამშრომელიც გაათავისუფლა.

”სამხრეთის კარიბჭე” ვითარების გასარკვევად ”ჩემი ოჯახის კლინიკის” პრესცენტრს დაუკავშირდა. თუმცა უშედეგოდ, საავადმყოფოს ხელმძღვანელობისგან ამ დრომდე პასუხი ვერ მივიღეთ.

[თინათინ ზაზაძე, ახალციხე]