ასპინძაში ხეხილის ბაღები ხმება

მთავარი → საზოგადოება 17.04.2013

დაბა ასპინძის მოსახლეობას წლებია სარწყავი წყლის პრობლემა აქვს. ადგილობრივები ამბობენ, რომ უწყლობის გამო საუკუნოვანი ხეები გახმა.

ასპინძაში მცხოვრები შოთა ბერიძე გვეუბნება, რომ ასპინძელებს ხეხილის ბაღები უხმებათ, რისი მიზეზიც სარწყავი წყლის არქონაა.

”ეს პრობლემა უკვე წლებია გვაწუხებს, თუმცა რატომღაც ვერ მოგვარდა. ხალხს ბაღები აქვს და წყალი არა, რომ მორწყოს ხეები. არადა წყალს მიაქვს ჩვენი დაბა”, - ხუმრობს იგი.

იგივე პრობლემაზე გვესაუბრება ფერმერთა სახლის თავმჯდომარე ნუგზარ ლონდარიძეც. იგი ამბობს, რომ რამდენიმე წლის წინ სარწყავი სისტემის მოწესრიგება სცადეს, თუმცა, პრობლემა მხოლოდ ნაწილობრივ მოგვარდა.

”რამდენიმე წლის წინ ვითომ გაკეთდა, მაგრამ ისე მაინც არ არის გაკეთებული, ყველას რომ ჰქონდეს სარწყავი წყალი”, - ამბობს იგი და აქვე ამატებს, რომ ეს მხოლოდ ადგილობრივი ხელისუფლების პასუხისმგებლობა არ არის, - ”მოსახლეობამაც ხომ უნდა იგრძნოს გარკვეული პასუხისმგებლობა”.

ასპინძის მუნიციპალიტეტში ამბობენ, რომ 2012 წელს მუნიციპალიტეტში სამი წყალსაქაჩი აღდგა, მათ შორის ორი ასპინძაში.

”რეაბილიტაცია ჩაუტარდა და აღდგა ასპინძაში არსებული თითქმის ყველა სარწყავი არხი. წელს კიდევ ერთი საქაჩის აღდგენას ვაპირებთ”,- გვაიმედებს ასპინძის მუნიციპალიტეტის გამგებელი ბესიკ ბექაური.

[ნინო ზედგინიძე, ასპინძა]