ასპინძაში სარწყავი წყლით სარგებლობის საფასური განისაზღვრა

ხვილიშას მცხოვრებლებმა, რწყვის სეზონზე, ერთი საათი მომსახურებისთვის 12 ლარი უნდა გადაიხადონ. გადაწყვეტილებას 23 ივლისის რიგგარეშე სხდომაზე, ასპინძის მუნიციპალიტეტის დეპუტატებმა მხარი დაუჭირეს.

თვითმმართველობის ინფორმაციით, ასპინძის გარეუბნის, ხვილიშას მცხოვრებლებს ამ დრომდე სარწყავი წყალი არ მიეწოდებოდათ, რადგან სისტემა არ მუშაობდა. მისი რეაბილიტაციის შემდეგ, საკრებულომ თანხის ოდენობა და სისტემაზე პასუხისმგებელი პირი განსაზღვრა.

„აქამდე ეს სარწყავი სისტემა არ მუშაობდა. ჩაუტარდა რემონტი და ფაქტობრივად, ახალი სარწყავი სისტემაა. ამიტომ განისაზღვრა მისი საფასური და იქნება ერთი პასუხისმგებელი პირი, რომელიც ყურადღებას მიაქცევს, რომ ერთმანეთს არ შეუწყვიტონ წყალი“, - ამბობს ასპინძის საკრებულოს თავმჯდომარე მამუკა მელიქიძე.

მისივე თქმით, ასპინძის მერიის ინიციატივით, დაბასა და სოფელ ივერიაში 11 ივლისის სტიქიის დაზარალებულებისთვის გადასახადი გაუქმდა.

ამავე თემაზე ნახეთ - უფასო მორწყვა და სახურავები - ასპინძის მერია სტიქიით დაზარალებულებს ეხმარება

[თაკო ფეიქრიშვილი, ასპინძა]