ვალეში, მოსახლეობა ძველი სარწყავი წყლის სისტემის რეაბილიტაციას ითხოვს

ვალეში მცხოვრებ ტრისტან ჩიტაშვილის ე.წ. მოკრულების ტერიტორიაზე 450 კვ/მ ნაკვეთზე 25 ძირი მსხმოიარე ვაშლის ბაღი ჰქონდა გაშენებული. წლების წინ, სტიქიის შედეგად სარწყავი წყლის მილის დაზიანების გამო, ხეების მორწყვა ვეღარ შეძლო, ამიტომ მის ბაღში 25–დან მხოლოდ შვიდი ძირი ვაშლის ხეა შემორჩენილი, დანარჩენი კი გახმა.

„მამა–პაპურ სარწყავ არხში წყალი რომ იყო, ხარობდა ყველაფერი. 2016 წლიდან ბაღები არ მოგვირწყავს, დახმა ყველაფერი“, – გვითხრა ტრისტანმა.

ამ ტერიტორიაზე ერთკილომეტრიანი მოსარწყავი წლის მილი 2015 წელს, სტიქიის დროს დაზიანდა.

„მაშინ ადგილობრივი მთავრობა იყო ჩამოსული, ნახეს და დაგვპირდნენ, უნდა გავაკეთოთო. მე მშენებელ–ინჟინერი ვარ და ვუთხარი, რომ ჩამოშლილ მიწათხრილთან მონოლითური რკინა–ბეტონის არხები უნდა მოწყობილიყო და მიწის პირველი ფენა უნდა მოხსნილიყო, რომ ყოველი წვიმისას არხი არ გაჭედილიყო“, – გვეუბნება ტრისტანი.

ამავე ტერიტორიაზე, სადაც სარწყავი წყლის პრობლემა მეოთხე წელია აწუხებთ, პავლე ათუნაშვილმა ვაშლის ბაღი სამი წლის წინ გააშენა. როგორც თავად ამბობს, სტიქიის შემდეგ თვითმმართველობისგან იმედი ჰქონდა, რომ კვლავ აღდგებოდა საირიგაციო სისტემა.

„რახან იმედი მომცეს, რომ არხი გაკეთდებოდა, ბაღის გაშენება გადავწყვიტე. წყლის საქაჩით ვრწყავდი, ნერგებიც პატარები იყო და არ მიჭირდა. ახლა უკვე აღარ ყოფნის ეს წყალი, რადგან მსხმოიარობა დაიწყო“, – გვითხრა პავლე ათუნაშვილმა.

პავლეს წელს სამი დღე დასჭირდა, რომ მთლიანი ბაღი მოერწყა.

ადგილობრივები ამბობენ, რომ სტიქიის შემდეგ თვითმმართველობამ ამ არხის აღდგენა იმავე წელს გადაწყვიტა, მოამზადა პროექტი, მძიმე ტექნიკა მიიყვანა და ტერიტორია გადათხარა, თუმცა წყალი ვერ გამოიყვანა, რადგან მდინარე ფოცხოვმა აღნიშნულ ტერიტორიაზე მიმართულება შეიცვალა.

მათივე თქმით, მოგვიანებით, 2016 წელს, წყლის პროექტს თვითმმართველობამ მიმართულება შეუცვალა და ნაკვეთები საირიგაციო სისტემის გარეშე დატოვა. შედეგად მიმდებარე ნაკვეთების ნაწილი დასამუშავებლად გამოუსადეგარი გახდა.

აღნიშულ პრობლემაზე მოსახლეობამ „საერთაშორისო გამჭირვალობა საქართველოს“ რეგიონულ კოორდინატორ თამუნა უჩიძეს მიმართა.

„ჩვენ მივმართეთ თვითმმართველობას თხოვნით, რომ უახლოეს პერიოდში ბიუჯეტში ცვლილების შეტანისას, ან ახლი ბიუჯეტის დაგეგმვისას, ეს პრობლემა გაითვალისწინონ. როგორც მერიამ მოგვწერა, ამ საკითხს სწავლობენ“, – გვითხრა საერთაშრისო გაჭვირვალობა – საქარველოს კოორდინატორმა თამუნა უჩიძემ.

ე.წ. მოკრულების ტერიტორიაზე, სადაც სარწყავის წყლის პრობლემაა, მიწის ნაკვეთი 20–მდე ადგილობრივს აქვს. რას გეგმავს ახალციხის მუნიციპალიტეტის მერია, ამ ეტაპზე უცნობია.

ადგილობრივ თვითმმართველობაში მხოლოდ ის გვითხრეს, რომ „მუშაობენ“.

„მეწყერი ჩამოწოლილა და მაგ ოჯახებს იმიტომ არ აქვთ სარწყავი წყალი. ამ პრობლემაზე მერია მუშაობს და შესაბამისი ღონისძიებები გატარდება“, – გვითხრეს მერიის საზოგადოებასთან ურთიერთობის სასმახურში.



[თორნიკე ზაზაძე, ახალციხე]