დაბა ასპინძაში წყალმომარაგების სისტემის რეაბილიტაცია მიმდინარეობს

წყალმომარაგების კომპანიაში ამბობენ, რომ წყლის ინფრასტრუქტურის რეაბილიტაციის შედეგად დაბა ასპინძის 600-მდე ოჯახს წყლის გრაფიკისა და წყლის ხარისხის პრობლემა მოუგვარდება, კერძოდ, პროექტის განხორციელების შედეგად, დაბა ასპინძაში მნიშვნელოვნად შემცირდება წყლის დანაკარგები და გაუმჯობესდება, როგორც წყლის ხარისხი, ასევე წყლის მიწოდების გრაფიკი.

ასპინძის მოსახლეობას ამჟამად ზოგიერთ უბანზე 2-3- საათიანი გრაფიკით მიეწოდება წყალი, ხოლო ზოგიერთზე 10-საათიანი გრაფიკით, პროექტის განხორციელების შედეგად კი 16-24 საათიან რეჟიმში მიიღებენ მაღალი ხარისხის სასმელ წყალს.

"პროექტის განხორციელების შედეგად ასპინძის მოსახლეობას წლების განმავლობაში არსებული პრობლემა მოუგვარდება. სამშენებლო სამუშაოებზე 30 ადამიანზე მეტია დასაქმებული", – აცხადებენ წყალმომარაგების კომპანიაში.

პროექტის ფარგლებში მოხდება 100 მ³ მოცულობის არსებული რეზერვუარის გადახურვა, შეიცვლება ამორტიზებული მაგისტრალური მილსადენი საერთო სიგრძით 4.5 კმ. ამ ეტაპზე უკვე მოწყობილია 1150 მეტრი მილსადენი. ასევე დაგეგმილია გამანაწილებელი ქსელის მშენებლობა–რეაბილიტაცია საერთო სიგრძით 2,768 მ. და სადარაჯო ჯიხურის შეკეთება და შემოღობვა.

[ნინო ნარიმანიშვილი, ახალციხე]