დაბა ასპინძაში სარწყავი არხის რეაბილიტაცია იგეგმება

დაზიანებული სარწყავი სისტემის გამო ნაკვეთებამდე წყლის მცირე ოდენობა აღწევს, გარდა ამისა, იქ სადაც ქსელი გაფუჭებულია ნიაღვარი სახლებსა და მიმდებარე ინფრასტრუქტურას აზიანებს.

„ციხის უბნიდან ქვედა უბნამდე ხალხს წყალი სარდაფებსა და სახლების საძირკვლებში შედის, გამოჟონილი წყალი აზიანებს ასფალტის საფარსაც. დაბაში სარწყავი და სანიაღვრე წყლის ამ მასშტაბის მოწყობა ათწლეულებია არ მომხდარა“, – ამბობს ასპინძის მერიის ინფრასტრუქტურის სამსახურის უფროსი ანზორ ალელიშვილი.

მისი თქმით, არხს სარწყავთან ერთად სანიაღვრე ფუნქციაც აქვს. აქ სარწყავი წყალი მდინარე ოთისწყლიდან მოედინება.

ასპინძის მერია სარწყავი არხის რეაბილიტაციისთვის დაახლოებით ნახევარ მილიონ ლარს დახარჯავს. ამჯერად მერიას 12 300 ლარზე ტენდერი საპრექტო–სახარჯთაღრიცხვო დოკუმენტების შედგენისთვის აქვს გამოცხადებული.

[ავთო ინასარიძე, ასპინძა]