საბარგო სადგურის მცხოვრებლებს მერი ხვდება

როგორც მერი შეკრებილებს ეუბნება, საბარგო სადგურზე საკანალიზაციო ქსელის მოსაწყობად პროექტი უკვე არსებობს. სამუშაოების ღირებულება 1.100.000 ლარია და მშენებლობას "საქართველოს გაერთიანებული წყალმომარაგების კომპანია" აგვისტოდან დაიწყებს.

"აქამდე ხომ მოიცადეთ, ცოტაც გვაცალეთ", – ეუბნება მერი შეკრებილებს, რომლებმაც ვლადიმერ ზედგინიძეს საუბარი რამდენჯერმე შეაწყვეტინეს.

"აგვისტომდე დავიწამლებით, ღია საკანალიზაციო არხი მაინც დახურეთ", – ამბობენ შეკრებილები.

შეგახსენებთ, ახალციხეში, საბარგო სადგურზე მცხოვრებლებმა, რომლებიც წლებია დასახლებაში საკანალიზაციო ქსელი მოწყობას ითხივენ, დღეს პროტესტის უკიდურეს ფორმას მიმართეს და ახალციხის შემოსასვლელში თბილისი – ახალციხის ცენტრალური მაგისტრალი გადაკეტეს. ვიდრე მაგისტრალს გადაკეტავდნენ, ადგილობრივებმა კანალიზაცია, რომელიც ღია არხში მიედინებოდა, გზაზე გადაუშვეს. შემდეგ კი გზაზე ქვები დაყარეს და ავტომობილებს არ ატარებენ.

შემთხვევის ადგილზე აქციის დაწყებიდან რამდენიმე წუთში საპატრულო პოლიციის ეკიპჟები მივიდნენ. ისინი ცდილობენ ადგილობრივები გზის გვერდზე გადიყვანონ და სავალი ნაწილი გაათავისუფლონ.

[sknews.ge]