რა ბედი ეწევათ ბორჯომის დამეწყრილ ოჯახებს

ბორჯომში 21 მაისის სტიქიის შედეგად თორის ქუჩაზე ყველაზე მეტად ერთი ბინა დაზიანდა, რომელშიც ხუთი ოჯახი ცხოვრობს. ბორჯომის მუნიციპალიტეტის გამგებლის პირველი მოადგილის ანზორ სვანიძის განმარტებით, სწორედ ამ ბინის წინ დაგროვდა მთიდან ჩამოსული მასა, ნიაღვარი კი 4–5 საათის განმავლობაში აღნიშნული სახლის პირველ სართულზე დიოდა.

„შეიძლება ეს შენობა საცხოვრებლად აღარ იყოს ვარგისი. ჩამოვიყვანთ აუდიტს, რომელმაც უკვე შეისწავლა მდგომაროება და 2–3 დღეში გადავწყვეტთ როგორ მოვიქცევით. შესაძლოა გავიყვანოთ ეს ოჯახები, ან შენობას საძირკველი გავუმაგროთ, რომელიც არცთუ ნაკლები თანხა დაჯდება“, – განაცხადა ანზორ სვანიძემ.

მისი თქმით,რაც შეეხება დანარჩენ ოჯახებს, აუდიტმა უკვე დაითვალა სტიქიის შედეგად მიყენებული ზარალი, თუმცა რა ოდენობაზეა საუბარი, ჯერ ცნობილი არ არის.

შეგახსენებთ, რომ ინტენსიური წვიმის შედეგად 21 მაისს ბორჯომში, თორის ქუჩაზე მეწყერი დაახლოებით 21:00 საათზე ჩამოწვა. მიწის დიდმა მასამ სანიაღვრე არხი ჩაკეტა, რის გამოც დაგუბებული წყალი ადგილობრივების საცხოვრებელ სახლებში შევარდა.

[თინათინ ზაზაძე, ბორჯომი]