ბორჯომში სეტყვისგან მიყენებული ზარალი შესწავლილია, თანხა არაა ცნობილი

ბორჯომში ძლიერი სტიქია შვიდ ივნისს იყო. უხვმა ნალექმა ქუჩები და ეზოები დატბორა, სეტყვის შედეგად კი საცხოვრებლების სახურავები დაზიანდა.

ამ ეტაპზე, ბორჯომის მერიაში 27 განცხადებაა შესული. ადგილობრივები, ძირითადად, საცხოვრებლების სახურავის შეკეთებას ითხოვენ. სტიქიის შემდეგ, დაზიანდა 11 კორპუსისა და კერძო საცხოვრებლის სახურავები.

თვითმმართველობაში ვერ საუბრობენ იმის შესახებ, თუ რა თანხა იქნება საჭირო ზიანის ასანაზღაურებლად. ბორჯომის მერის მოადგილე ბუბა ბერიძე განმარტავს, რომ ზარალი დიდია: „შევისწავლეთ ყველა შემთხვევა. დაახლოებით ორ დღეში გვეცოდინება ზუსტი თანხა. ყველას დავეხმარებით, თუმცა ადგილობრივი ბიუჯეტით, სავარაუდოდ, ვერ მოვერევით ამას. ამიტომ ახლა მიდის მუშაობა, რომ ცენტრალური ხელისუფლებიდანაც გამოიყოს დახმარება“.

მისივე თქმით, სამუშაოებისთვის მერია ტენდერს არ გამოცხადებს, რადგან შესყიდვები გარკვეულ დროს მოითხოვს: „რადგანაც სტიქიაა, გვაქვს იმისი საშაულება, რომ პირდაპირი ხელშეკრულებები გავაფორმოთ, თუმცა პირველ ეტაპზე, თანხების მოძიებაზეა საუბარი. ტენდერების დასრულებას ვერ დაველოდებით. არის იმის საშიშროება, რომ მოსახლეობას კიდევ ჩაუვიდეს წყალი სახლში,“ - ამბობს მერის მოადგილე ბუბა ბერიძე.

[თაკო ფეიქრიშვილი, ბორჯომი]