ბორჯომში ნახანძრალი კორპუსის გადახურვას იწყებენ

ბორჯომში, თორის ქუჩაზე N44-ში მდებარე კორპუსში ხანძრისგან დამწვარი სახურავის გასაკეთებლად ადგილობრივი ბიუჯეტიდან 45 000 ლარი დაიხარჯება.

„ტენდერს არ ვაცხადებთ, პირდაპირი შესყიდვის წესით სახურავს შპს „my town“–ი შეცვლის“, – ამბობს ბორჯომის მუნიციპალიტეტის მერიის საზოგადოებასთან ურთიერთობის სამსახურის წარმომადგენელი ლონდა ფილიშვილი.

დღეს, შვიდ მარტს ბორჯომის მერიამ დაზარალებულ ორ ოჯახს სურსათისა და ტანსაცმლის შესაძენად 700–700 ლარი დაურიცხა.

„მათ ამ თანხას აქამდეც ჩავურიცხავდით, თუმცა დაზარალებულების მხრიდან საჭირო დოკუმენტების, პირადობის მოწმობებისა და საბანკო ამონაწერების მერიაში მოტანა დროში გაჭიანურდა“, – ამბობს ბორჯომის მუნიციპალიტეტის მერის მოადგილე ბუბა ბერიძე.

ხვალიდან, რვა მარტიდან თორის ქუჩზე ხანძრისგან მიყენებულ ზარალს მერიის მიერ დაქირავებული აუდიტი შეისწავლის.ბერიძის თქმით,
„როცა ზარალს დაითვლიან, მაშინ გაირკვევა დაზარალებულ ოჯახებს თუ რამდენი ლარით დაეხმარებიან".

შეგახსენებთ, რომ თორის ქუჩაზე ხანძარი 26 თებერვალს, დილით გაჩნდა. ხანძრის შედგად მთლიანად დაიწვა ერთი ბინა, ხოლო სამი დაზიანდა. ბორჯომის მერიამ ორი ოჯახი ნაქირავებ ფართში გაიყვანა.

ორსართულიან კორპუსში, რომელიც დაახლოებით ერთი საუკუნის წინ აშენდა, 11 ბინაა, ამ ეტაპზე აქ რვა ოჯახი ცხოვრობს, ადგილობრივები ამბობენ, რომ წასასვლელი არსად აქვთ.

[თინათინ ზაზაძე, ბორჯომი]