ბორჯომში მეწყერმა ადგილობრივების სახლები დააზიანა [photos]

შემთხვევა ბორჯომში გუშინ, 20 მაისს, საღამოს მოხდა.

"საკმაოდ დიდი მოცულობის მეწყერია. სანიაღვრე არხი, რომელიც მთის ფერდობიდან მოდის ამოივსო, შეიცვალა კალაპოტი და მოსახლეობაში გადმოვიდა. სახლებში შევარდათ მეწყერი და რამდენიმე ოჯახს ზარალი მიადგა. საბედნიეროდ მსხვერპლი არ არის",– განაცხადა ბორჯომის მუნიციპალიტეტის გამგეობის არქიტექტურისა და მშენებლობაზე ზედამხედველობის უფროსმა ზურაბ ქიტიაშვილმა.

მისივე თქმით,გაწმენდითი სამუშაოები მთელი ღამის განმავლობაში მიმდინარეობდა და დღესაც გრძელდება:"დიდი მასაა, რამდენიმე დღე დასჭირდება გასუფთავებას. 3–4 სახლი დაზიანდა, თუმცა მთელს ქუჩას შეექმნა პრობლემა".

ბორჯომის მუნიციპალიტეტის გამგეობაში აცხადებენ, რომ დაზარალებული ოჯახები ადგილობრივი თვითმმართველობისგან კონპენსაციას მიიღებენ.

შეგახსენებთ, რომ სინოპტიკოსები სამი დღის განმავლობაში აღმოსავლეთ საქართველოში წვიმას პროგნოზირებენ. ამ დრომდე წვიმს ბორჯომშიც.






[თინათინ ზაზაძე, ბორჯომი]