აუდიტმა ნახანძრალ კორპუსში ხუთი ოჯახის ზარალი დაითვალა

"ეს თანხა ოთახების რეაბილიტაციისთვის საკმარისია, მუშახელის ფასი ამაში გათვალიწინებული არ არის. ვინც ყველაზე მეტად დაზარალდა იმის სახლში სამი კარია დამწვარი, კედლები ჩამოიფხიკება, გაიშპაკლება და შპალერი გაიკვრება, ხოლო იატაკი მოიწმინდება", – ამბობს აუდიტორული კომპანიის წარმომადგენელი დავით ბაქრაძე.

აუდიტის დასკვნის მიხედვით, იმ ოჯახს, რომელსაც აქ ბინა ნაქირავები ჰქონდა და ხანძარმა ყველა ოთახი დაუწვა, 4 015 ლარი ეკუთვნის; აქედან 2 085 ლარს ის ოჯახი მიიღებს, რომელსაც ბინა ნაქირავები ჰქონდა, მისი მეპატრონეს კი 581 ლარს დაურიცხავენ. იმ სამმა ოჯახმა კი რომელსაც ხანძრის დროს წყალი ჩაუვიდა, 1 000, 1 080 და 581 ლარის ზარალი მიიღო;

"მადლობლები ვართ რასაც გვაძლევენ, ესეც რომ არ მოეცათ რას ვიტყოდით", – ამბობს ერთ–ერთი დაზარალებული ქეთევან ლომიძე.
ნახანძრალ კორპუსში მერიამ სახურავის შესაცვლელად 49 200 ლარი უკვე გამოყო და სამუშაოებიც დაიწყო.

თორის ქუჩაზე ხანძარი 26 თებერვალს გაჩნდა. ხანძრის შედეგად მთლიანად დაიწვა ერთი ბინა, ხოლო სამი დაზიანდა. ორსართულიან კორპუსში, რომელიც დაახლოებით ერთი საუკუნის წინ აშენდა, 11 ბინაა და რვა ოჯახი ცხოვრობს.

[თიანთინ ზაზაძე, ბორჯომი]