სოფელ ორგორაში ახალი სკოლა აშენდება, თუმცა, როდის უცნობია

ასპინძის მუნიციპალიტეტის სოფელ ორგორაში სკოლის შენობა 4 წლის წინ დაიწვა. ცეცხლი შენობას ღამის საათებში მოედო, ამიტომ შემთხვევისგან არავინ დაშავებულა, თუმცა განადგურდა ინვენტარი.

სკოლაში 85 ბავშვი სწავლობდა. სკოლის დაწვის შემდეგ, მოსწავლეების ნაწილი სასწავლებლად სხვადასხვა სკოლებში გადავიდა, უმეტესობა ასპინძის სკოლაში. ამ ეტაპზე სოფელში 7 მოსწავლეა დარჩენილი, რომლებიც მეზობლად მდებარე, სოფელ სახუდაბელის სკოლაში სწავლობენ.

სოფელში მცხოვრებლები სკოლის აშენებას 4 წელია ითხოვენ. ადგილობრივები ამბობენ, რომ ეს სოფელს მიგრაციისა და დაცლისგან დაიცავს.
საქართველოს განათლებისა და მეცნიერების სამინისტროში „სამხრეთის კარიბჭეს“ განუცხადეს, რომ დამწვარი სკოლის ნაცვლად ორგორაში ახალი სკოლა უნდა აშენდეს.

განათლების სამინისტროს ინფრასტრუქტურის დეპარტამენტის დირექტორის მოადგილის თემურ მაჩაიძის განმარტებით, ტერიტორია სადაც ახალი სკოლა უნდა აშენდეს, უკვე შესწავლილია, თუმცა, დამატებითი დეტალები ჯერ უცნობია.

„სოფელ ორგორის სკოლის აშენება განათლების სამინისტროს მიმდინარე წლის სამოქმედო გეგმაშია. ამ ეტაპზე საპროექტო სამუშაოები დავიწყეთ, როდის დასრულდება ეს სამუშაოები და მოხერხდება თუ არა სასწავლო დაწესებულების მშენებლობის დაწყება ჯერ არ ვიცით“, – ამბობს მაჩაიძე.

ამ ეტაპზე გარკვეული არც ისაა, რა თანხაა გათვალისწინებული ორგორის სკოლის ასაშენებლად.

[ლუბა გიორგაძე, ასპინძა]