ორგორის დამწვარი სკოლა და ხუთი კილომეტრი მეზობელ სოფლამდე

სოფელ ორგორაში სკოლა გასული წლის დეკემბერში დაიწვა. ხანძარი გაუმართავმა ელექტრო გაყვანილობამ გამოიწვია. მას შემდეგ სკოლის მოსწავლეებს მეზობელ სოფელში ხუთი კილომეტრის გავლა უწევთ. ისინი ახლა სოფელ ხიზაბავრის საჯარო სკოლაში სწავლობენ.

ორგორის საბაზო სკოლის ყოფილი პედაგოგი ქსენია ზედგინიძე ამბობს, იმის გამო, რომ სოფელში სკოლა აღარ ფუნქციონირებს, სოფელი ნელ-ნელა იცლება.

- ”ორგორის მოსახლეობა იმ სოფლებში გადადის საცხოვრებლად, სადაც სკოლებია, რადგან ბავშვებს ამხელა გზაზე სიარული უჭირთ. ტრანსპორტიც არ დადის”, - ამბობს იგი.

აღნიშნული პრობლემის მოსაგვარებლად სკოლის ადმინისტრაციამ ასპინძის მუნიციპალიტეტის გამგეობას მიმართა.

- ”ჩვენი პრობლემა მაშინდელ გამგებელს ავუხსენით და გვითხრა, რომ გაგიკეთებთო, მაგრამ დაპირება დაპირებად დარჩა. ახლა გავიგეთ, რომ გამგებელი იცვლება და ვის მივმართოთ, არ ვიცი”, - ამბობს ქსენია ზედგინიძე.

ასპინძის მუნიციპალიტეტის ყოფილი გამგებელი ბესიკ ბეაქური ამბობს, რომ ეს პრობლემა საქართველოს განათლებისა და მეცნიერების სამინისტროს კომპეტენციაში შედის.

- ”ეს საქმე განათლების სამინისტროს გადავუგზავნეთ და შემდეგ რა მოხდა არ ვიცი, მგონი დაიწყეს ახალი სკოლის აშენება”, - ამბობს ბექაური.

საქართველოს განათლებისა და მეცნიერების სამინისტროში განმარტავენ, რომ აღნიშნული სკოლა იმ სკოლების ჩამონათვალში შედის, რომელიც აუცილებლად შეკეთდება.

- ”უახლოეს მომავალში დაზიანებული სკოლების განხილვა და მათი შეკეთება დაიწყება”, - ამბობს განათლებისა და მეცნიერების სამინისტროს პრესსამსახურის უფროსი თიკო ფეიქრიშვილი.

[ნინო ზედგინიძე, ახალციხე]