ახალციხის ეპარქია ოჯახის სიწმინდის დღესთან დაკავშირებულ აქციას შეუერთდა

დღეს, 17 მაისს საპატრიარქოს მიერ დაწესებული ოჯახის სიწმინდის დღესთან დაკავშირებით თბილისში აქციები იმართება. მათ დილიდანვე ახალციხისა და ტაო–კლარჯეთის ეპარქიის წარმომადგენლები სრული შემადგენლობით შეუერთდნენ.

ამის შესახებ „სამხრეთის კარიბჭესთან“ ეპარქიის სასულიერო პირები სატელეფონო საუბარში აცხადებენ. მათი თქმით, ახალციხისა და ტაო–კლარჯეთის მიტროპოლიტის თეოდორე ჭუაძის ლოცვა–კურთხევით მთელი ეპარქია, ყველა მღვდელი და წინამძღვარი აქციაზე გაემგზავრა.

„ყველა სასულიერო პირია წამოსული თავისი მრევლით. რამე რომ მოხდეს და მღვდელი იყოს საჭირო ამისთივს მხოლოდ მამა სტეფანეა დარჩენილი ეპარქაიში. იმის გამო რომ სამუშაო დღე იყო, მრევლიდან ბევრმა წამოსვლა ვერ შეძლო“– ამბობს მღვდელი ნიკოლოზ აბრამაშვილი.

სასულიერო პირების თქმით, გამგზავრებისთვის საწვავის ღირებულება ეპარქიამ დაფარა. ახალციხიდან თბილისის მიმართულებით, დაახლოებით, 10–მდე მიკრო ავტობუსი გაემგზავრა.

„აქ იმიტომ ვართ, რომ უწმინდესის ლოცვა–კურთხევაა, დღვანდელი დღე ოჯახის სიმტკიცის დღედ აღინიშნებოდეს. გვიყვარს ღმერთი და გვიყვარს ოჯახები!“ – აცხადებს მღვდელი ნიკოლოზ აბრამაშვილი.

ახალციხელი ბიბი გოგოლაძე თბილისში მრევლთან ერთად გაემგზავრა. მას მიაჩნია, რომ დღეს საქართველოსთვის მნიშვნელოვანი დღეა და ამიტომ იქ უნდა იდგეს, სადაც ოჯახის სიწმინდის დასაცავად იკრიბებიან: „აქ დგომით არაფრის შეცვლას არ ვცდილობთ, გვინდა რომ ოჯახის სიწმინდე დავიცვათ და გულისტიკივილი გამოვთქვათ დანგრეულ ოჯახებთან დაკავშირებით“.

შეგახსენებთ, რომ 17 მაისი ჰომოფობიასთან და ტრანსფობიასთან ბრძოლის საერთაშორისო დღეა. ამ დღის საქართველოში აღნიშნვას ეწინააღმდეგება მართლმადიდებელი ეკლესია და მისი მრევლი. საქართველოს პატრიარქის კურთხევით ეს დღე 2013 წელს ოჯახის სიმტკიცის დღედ გამოცხადდა.



[თამუნა უჩიძე, ახალციხე]