‘ეს კარგი ხარისხის უთოებია, ყველას დაგჭირდებათ’ – ახალციხის მერიამ ‘ოჯახის სიმტკიცის’ დღე აღნიშნა

მერიამ საჩუქრები 30 ოჯახს გადასცა. ოჯახები მერიის შენობაში მიიწვიეს.

„გილოცავთ, დღეს ოჯახის სიმტკიცის დღეა! მეორე წელია პატრიარქმა ეს დღე დააწესა და მეორე წელია ამ დღეს ასე ავღნიშნავთ“, – განაცხადა კულტურის სამსახურის უფროსმა მარინა ჯინჭველაძემ და დაამატა, – „ეს კარგი ხარისხის უთოებია, ყველას დაგჭირდებათ“.

ღონისძიებას ქალაქის მერი გიორგი კოპაძე დაესწრო. კოპაძემ მრავალშვილიან ოჯახის დიასახლისებს დღევანდელი დღე მიულოცა და საჩუქრები პირადად გადასცა.

„დღევანდელი დღე, როგორც იცით, პატრიარქმა გამოაცხადა ოჯახის სიწმინდის დღედ. ჩვენ უკვე მეორე წელია ამ დღესთან დაკავშირებით ვახდენთ მრავალშვილიანი ოჯახების დასაჩუქრებას. ეს დღე პირდაპირ მიმართულია ქართული ოჯახის სიწმინდესა და სიმტკიცესთან“, – განაცხადა ქალაქის მერმა გიორგი კოპაძემ.

„ძალიან დიდი პატივისცემაა ჩვენთვის, რომ ვახსენდებით“, – აღნიშნა მრავალშვილიანი ოჯახის დიასახლისმა მეგი თათეშვილმა.

უთოებისა და ტკბილეულის შესაძენად ახალციხის მერიის კულტურის სამსახურმა 1350 ლარი გამოყო.



[ვარლამ წიკლაური, ახალციხე]