საბავშვო ბაღების თანამშრომლებს სტიქიის დროს მოქცევას ასწავლიან

ტრენინგები ახალციხის მუნიციპალიტეტის ყველა საბავშვო ბაღის მენეჯერსა და ორივე ცვლის აღმზრდელებს უტარდება. პერსონალი სტიქიური უბედურებების დროს მოქცევის წესებს სწავლობს.

სკოლამდელი აღზრდის დაწესებულებათა გაერთიანების ხელმძღვანელი ნანა გელაშვილი ამბობს, რომ საბავშვო ბაღის თანამშრომლებისთვის ეს ტრენინგი აუცილებელი იყო.

- ’ცოტა ხნის წინ იყო შემთხვევა, როცა ცრუ ინფორმაცია გვარცელდა მიწისძვრის შესახებ და ბავშვები შენობებიდან გამოვიყვანეთ. ზოგმა არ იცოდა ამ შემთხვევაში როგორ უნდა მოქცეულიყო’, - ამბობს გელაშვილი.

ტრენინგი ტარდება ევროკავშირის ჰუმანიტარული მისიის მიერ დაფინანსებული პროექტის ფარგლებში - ”კატასტროფის რისკების შემცირების ინკლუზიური პროგრამა სამცხე-ჯავახეთის რეგიონში”. პროექტი საქართველოს ორ რეგიონში აჭარასა და სამცხე-ჯავახეთში ხორციელდება.

- ’პროექტის ფარგლებში სხვადასხვა სიმულაციები ინერგება. ანუ, ტრენინგის მონაწილეები მიდიან თავინთ ბაღებში და აქ მიღებულ ცოდნას პრაქტიკულად ახორციელებენ, შეაქვთ სამუშაო გეგმაში და ბავშვებმა უკვე იციან, როგორ უნდა მოიქცნენ მიწისძვრის, ხანძრის და სხვა სტიქიური უბედურებების დროს’, - ამბობს სკოლამდელი აღზრდის დაწესებულების ტრენერი ირმა ქურდაძე.

სამცხე-ჯავახეთის დანარჩენ მუნიციპალიტეტებში ტრენინგები უკვე ჩატარდა. პროექტის ფარგლებში სხვადასხვა ტიპის თვალსაჩინო მასალა მომზადდა, რომლებიც ბაღებს საჩუქრად გადაეცა.

”ათ აღსაზრდელზე ერთი პაკეტია, სადაც სხვადასხვა ტიპის სურათები და თვალსაჩინოებებია. პირველი ეტაპის დასრულების შემდეგ, ჩვენ ჩავატარებთ მონიტორინგს, როგორ დანერგეს ბაღებში ნასწავლი’, - ამბობს ირმა ქურდაძე.

აღნიშნული პროექტის ფარგლებში რეგიონის მასშტაბით რამდენიმე ბაღი შეირჩევა, რომლებსაც პროექტის დონორი ორგანიზაციები სხვადასხვა დახმარებებს გაუწევენ.

- ’მენეჯერებთან ერთად გავიარეთ საბაზისო კვლევის კითხვარი, სადაც მათ დაწერეს მათი საჭიროებები. ამ კითხვარების ანალიზის შემდეგ, ვფიქრობ, რომ შერჩეული ბაღებისთვის დახმარების აღმოჩენაც უახლოეს ხანში მოხდება”, - ამბობს ქურდაძე.

მისივე თქმით, ამ პროექტის კიდევ ერთი მნიშვნელოვანი ნაწილი ისაა, რომ სამცხე-ჯავახეთის სახელმწიფო სასწავლო უნივერსიტეტში პროფესიული პროგრამა მომზადდა. პროგრამაში ის მოდულიც შევა, რასაც ბაღის თანამშრომლები ამ ტრენინგებზე სწავლობენ: ’ეს გახდება საფუძველი იმისა, რომ აღმზრდელის მოსამზადელად ჩვენს უნივერსიტეტს პროფესიული მიმართულებით ძალიან წარმატებული პროგრამა ექნება. ველოდებით სტანდარტის დამტკიცებას, როგორც კი დამტკიცდება ამ პროგრამას აკრედიტაციაზე გავიტანთ’.

[თამარ თოთაძე, ახალციხე]