რეგიონული მედიის ასოციაცია ახალციხეში არჩევნების თემაზე ტრენინგს ჩაატარებს

ტრენინგს ახალციხის საჯააარო სკოლების უფროსკლასელები და სამცხე–ჯავახეთის სახელმწიფო უნივერსიტეტის სტუდენტები დაესწრებიან.

ორდღიანი ტრენინგის პირველი დღე ინფორმაციული იქნება. რეგიონული მედიის ასოციაციის იურისტი პაატა ცნობილაძე, მოწვეულ ტრენერთან - ქეთევან მამამთავრიშვილთან ერთად, ახალგაზრდებს საქართველოს სახელმწიფოებრივი მოწყობის მოდელს, ქვეყნის მართვის პროცესში ამომრჩევლის მონაწილეობის გზებს (რა არის დემოკრატია, არჩევნები, რეფერენდუმი და პლებისციტი), არჩევითი ორგანოების ფორმირებასა და ქვეყანაში არსებულ საარჩევნო კანონმდებლობას გააცნობს.

ტრენინგის პირველი დღე ასევე დაეთმობა წინასაარჩევო კამპანიას, პოლიტიკური პარტიებისა თუ სუბიექტების უფლებამოსილებას, საარჩევნო უბნის გახსნიდან დახურვამდე არსებული პროცედურების გაცნობას.

მეორე დღეს კი ტრენინგი იმიტირებული საარჩევნო პროცესით გაგრძელდება. ახალგაზრდები ონაწილეობას მიიღებენ არჩევნების იმიტაციაში და ყველა იმ პროცედურას შეასრულებენ, რაც საარჩევნო უბნის გახსნიდან მისი დახურვის პერიოდამდე გრძელდება.

ტრენინგის დასრულების შემდეგ მონაწილეებს სერტიფიკატები გადაეცემათ. მათ დაურიგდებათ საინფორმაციო მასალები და ასევე შესაძლებლობა ექნებათ, რომ ჩაერთონ ამ პროექტის ფარგლებში გამოცხადებულ კონკურსებში: საუკეთესო ესსე, საუკეთესო ფოტო, საუკეთესო სლოგანი.

ტრენინგი „რეგიონული მედიის ასოციაციის“ პროექტის - „რეგიონული მედია ახალგაზრდების საარჩევნო ინფორმირებისა და განვითარებისთვის“ - ფარგლებში ჩატარდება. პროექტს „საარჩევნო სისტემების განვითარების, რეფორმებისა და სწავლების ცენტრი“ აფინანსებს.

ტრენინგი ტარდება შემდეგ მისამართზე: ახალციხე, დიდიმამიშვილის ქ. N16. "სამხრეთის კარიბჭეს" ოფისი.
საკონტაქტო პირი ნინო ნარიმანიშვილი. ტელ.: 593 92 64 29

[sknews.ge]