მზადება საატესტატო გამოცდებისთვის

საქართველოს განათლებისა და მეცნიერების სამინისტროს განცხადებით, ახალი აპარატურა სკოლებში სტაბილურ და უსაფრთხო ინტერნეტკავშირს უზრუნველყოფს.

20 school box-ი, 169 კომპიუტერი და 18 მონიტორი სკოლებში ახალციხის საგანმანათლებლო რესურსცენტრმა გადაანაწილა. საგანმანათლებლო რესურსცენტრის უფროსის მოვალეობის შემსრულებელი დიანა ინასარიძე ამბობს, რომ school box-ებით მხოლოდ ის სკოლები აღიჭურვა, სადაც საატესტო გამოცდები ტარდება: "რაც შეეხება დანარჩენ აპარატურას, სკოლებზე საჭიროებისამებრ გადანაწილდა".

ახალციხის მეექვსე სკოლას შვიდი პროცესორი, კლავიატურა და ერთი school box-ი გადაეცა. დირექტორის მოადგილე ეკა დალალიშვილი ამბობს, რომ ახალი აპარატურა ხელს შეუწყობს მოსწავლის წარმატებას: "ხშირად იყო შეფერხებები ინტერნეტთან დაკავშირებით, ამის გამო, გასული წლის საატესტატო გამოცდებზე ბავშვებს არათანაბარ სიტუაციებში უხდებოდათ მუშაობა".

მეორე სკოლის დირქტორის მარინა ზედგინიძის თქმით, გასული წლის გამოცდებზე მცირე შეფერხებები ჰქონდათ ინტერნეტთან დაკავშირებით: "ამიტომ, გამოცდა შედარებით გვიან დასრულდა, თუმცა, ზოგადად, საგამოცდო პროცესისთვის ხელი არ შეუშლია". ამ სკოლიდან საატესტატო გამოცდებს წელს 58 მოსწავლე აბარებს.

ახალ აპარატურას სკოლებში IT მენეჯერები დაამონტაჟებენ. ახალციხის მუნიციპალიტეტის 20 საგამოცდო სკოლაზე სამი IT მენეჯერია გადანაწილებული. სამონტაჟო სამუშაოები ქალაქის და სოფლის სკოლებში ერთდროულად მიმდინარეობს. ათი მაისისთვის ყველა სკოლაში საგამოცდო ოთახები მზად უნდა იყოს.

საატესტო გამოცდები ე.წ CAT-ის ტიპის საგამოცდო მოდელით მეორე წელია ტარდება. იმ შემთხვევეში, თუ მოსწავლე გამოცდებზე სჭირო ქულათა რაოდენობას ვერ მოაგროვებს, გამოცდის ჩაბარების საშუალება სამი წლის განმავლობაში ეძლევა. რაც შეეხება იმ მოსწავლეებს, რომლებიც უარს ამბობენ საატესტატო გამოცდის ჩაბარებაზე, მათ განათლებისა და მეცნიერების სამინისტრო სერთიფიკატებს გადასცემს.

[თინათინ ზაზაძე, ახალციხე]