საატესტატო გამოცდები დაიწყო

2011-2012 სასწავლო წლის გამოსაშვები გამოცდები დილის 9:00 საათზე, ქართული ენისა და ლიტერატურის გამოცდით გაიხსნა.

ახალციხის მეექვსე საჯარო სკოლაში გამოცდას 23 მეთორმეტეკლასელი აბარებს. სკოლის დირექტორის ზაზა თამარაშვილის თქმით, საგამოცდო ოთახი ტექნიკურად გამართულია: “ოთახში შვიდი კომპიუტერი და ერთი ვიდეოთვალია დამონტაჟებული. ბავშვებს ყველანაირი პირობა აქვთ იმისთვის, რომ მშვიდად იმუშაონ”.

გამოცდისთვის განკუთვნილ დროს, ერთ საათსა და 40 წუთს, არავინ იყენებს. მოსწავლეები გამოცდას 15-20 წუთში აბარებენ. ნიკა ბერიძემ პირველი საატესტატო გამოცდა 15 წუთში დაამთავრა, ამბობს, რომ შედარებით რთული გრამატიკული ნაწილი იყო, თუმცა, ბარიერი გადალახა.

პრეტესტებთან შედარებით, გამოცდა რთული მოეჩვენა
თამთა მჟავანაძესაც: “სკოლაში გრამატიკა არ ისწავლება. ენის წიგნი საერთოდ ამოღებულია, ლიტერატურის წიგნში თუ შეგვხვდებოდა გრამატიკის რამდენიმე საკითხი”.

პირველი საჯარო სკოლის მოსწავლემ ლევან ზედგინიძემ 8,32 ქულა მიიღო. შედეგით კმაყოფილია და ყველა საგნის წარმატებით ჩაბარების იმედი აქვს. განსხვავებულად ფიქრობენ მისი თანაკლასელები, რომლებსაც განსაკუთრებით ტექნიკური საგნების ჩაბარების ეშინიათ.

“ფიზიკის, ქიმიის, მათემატიკის და ბიოლოგიის გამოცდის გვეშინია. არავინ ჩაიჭრება, თუმცა, ამ საგნებში მაღალი ქულების აღება ყველას გაუჭურდება”, - ამბობს ილონა გაჩეჩილაძე.

პირველი საჯარო სკოლა წელს 120-მა მეთორმეტეკლასელმა დაამთავრა. საატესტატო გამოცდას ყველა მათგანი აბარებს. გამოცდაზე ის მოსწავლეებიც გადიან, რომლებმაც გასულ წელს საატესტატო გამოცდაზე მინიმალური ბარიერი ვერ გადალახეს.

“ასეთი 10 ბავშვი გვყავს, თუმცა წელს გამოცდას მხოლოდ ნაწილი აბარებს”, - ამბობს პირველი სკოლის დირექტორი მაკა ჯანაშვილი.

რამდენი მოსწავლე ამთავრებს სკოლას მუნიციპალიტეტის მასშტაბით, ახალციხის საგანმანათლებლო რესურსეცნტრში ინფორმაცია არ აქვთ.

“მოსწავლეები სკოლებმა დაარეგისტრირეს, ამიტომ ჩვენ მონაცემთა ბაზა არ გვაქვს”, - ამბობს ახალციხის საგანმანათლებლო რესურსცენტრის უფროსის
მოვალეობის შემსრულებელი დიანა ინასარიძე.

ხვალ მეთორმეტეკლასელები გამოცდას უცხო ენაში ჩააბარებენ.

[მანანა სარაშვილი, ახალციხე]