ცვლილება საატესტატო გამოცდებში

საქართველოს განათლებისა და მეცნიერების სამინისტროს განცხადებით გამოცდების პირველი ეტაპი ჩატარდება 2013 წლის 15 თებერვლიდან 1 მარტის ჩათვლით, მეორე ეტაპი 2013 წლის 20 მაისიდან 29 მაისის ჩათვლით. მიმინოშვილის განცხადებით გამოცდების ფორმისა და საგამოცდო განრიგის საკითხების შესახებ გადაწყვეტილებას თავად სკოლები მიიღებენ. გამოცდების ჩაბარების უფლება ზოგად საგანმანათლებლო დაწესებულებლების დამამთავრებელი კლასის მოსწავლეებს და იმ პირებს აქვთ, რომლებმაც სრული ზოგადი განათლების საშუალო საფეხურის დაძლევის მიუხედავად, შესაბამის წელს სრული ზოგადი განათლების დამადასტურებელი დოკუმენტი ვერ მოიპოვა.

აბიტურიენტები ფიქრობენ, რომ მათ უფრო მეტი თავისუფალი დრო ექნებათ მოსამზადებლად ეროვნული გამოცდებისთვის და აღარ იფიქრებენ საატესტატო გამოცდებზე.

- ”ტელევიზიით მოვისმინე ამ სიახლის შესახებ, ძალიან მომეწონა, რომ შესაძლებლობა გვაქვს ჯერ ოთხი გამოცდა ჩავაბაროთ შემდეგ კიდევ ოთხი. მიმაჩნია, რომ კარგად ვარ მომზადებული და არ გამიჭირდება ამ ეტაპზე გამოცდების ჩაბარება. ამით დავზოგავ დროს და უფრო კარგად მოვემზადები ეროვნული გამოცდებისთვის”, - ამბობს ახალციხის კერძო სკოლა ”მზექას” მე-12 კლასის მოსწავლე ვაჟა გიორგაძე.

ამ სიახლით მოხარულია ამავე სკოლის მე-12 კლასის მოსწავლე მერაბ გელაშვილიც, როგორც თავად ამბობს, იმდენად კარგადაა მომზადებული, რომ პირველივე ეტაპზე ჩააბარებს საატესტატო გამოცდას და არ დაჭირდება მეორე ეტაეზე გასვლა.

გელაშვილისა და გიორგაძისგან განსხვავებით სხვაგვარად ფიქრობს #2 საჯარო სკოლის მე-12 კლასის მოსწავლე არმენ გრიგოლიანი: ”ჯერ საკმარისად არ ვართ ყველა საგანში მომზადებული და ამან შეიძლება შეგვიქმნას პრობლემა, მაგრამ კარგია ის რომ მაისში ისევ შეგვეძლება გადაბარება თუ ეხლა ვერ ჩავაბარებთ.

ახალციხის საჯარო სკოლების დირექტორები ამბობენ, რომ მათ ჯერ ამ თემასთან დაკავშირებით არ შეუმუშავებიათ გეგმა თუ რა საგნებს ჩააბარებენ პირველ ეტაპზე აბიტურიენტები.

[ნუკა სტეფნაძე]