ახალციხის მესამე სომხურენოვან სკოლაში გამოცდები გადაიტანეს

მე-3 საჯარო სკოლის დირექტორის მოადგილე სუსანა მინასიანი ამბობს, რომ ეს გადაწყვეტილება თავად მოსწავლეებმა მიიღეს: ’ჩვენს სკოლას ყველაფერი მზად ჰქონდა გამოცდების ჩასატარებლად, ტესტებიც შედგენილია. მაგრამ მოსწავლეების თხოვნა გავითვალისწინეთ’.

მოსწავლეები გამოცდების გადატანის სურვილს მოუმზადებლობით ხსნიან. ისინი ამბობენ, რომ რადგან სამინისტრომ არჩევანის საშუალება მისცა, ურჩევნიათ უკეთესად მოემზადონ და ყველა გამოცდა ერთად ჩააბარონ.

სუსანა მინასიანის თქმით, მე-3 სკოლაში გამოცდები წერით ჩატარდება. წელს, ამ სკოლიდან, გამოცდებზე 12 მოსწავლე გადის. გამოცდებს ის მოსწავლეებიც ჩააბარებენ, რომლებმაც გასულ წელს ზღვარი ვერ გადალახეს.

შეგახსენებთ, რომ გასულ წელს საატესტატო გამოცდებზე არაქართულენოვან სკოლებში განსაკუთრებით ფიზიკა-ქიმიისა და მათემატიკის გამოცდა გაუჭირდათ.

მე-3 საჯარო სკოლაში ამ ეტაპზე სატესტატო გამოცდებისთვის რეგისტრაცია მიმდინარეობს.

[ნუკა სტეფნაძე, ახალციხე]