ახალციხე ახალგაზრდული იდეების კონკურსში ერთვება

ახალციხე სპორტისა და ახალგაზრდობის საქმეთა სამინისტროს მიერ გამოცხადებულ კონკურსში პირველად ერთვება.

„გვინდა რომ ახალგაზრდებს ამ კონკურსის პროცედურების შესახებ გავაცნოთ. კონკურსმა მთელი საქართველო უკვე მოიცვა, თუმცა სამცხე–ჯავახეთი ნაკლებად იყო ჩართული. გასულ წელს კონკურსში მხოლოდ ბორჯომი მონაწილეობდა, ჩვენ გვინდა, რომ ახლა მთელი რეგიონი მოვიცვათ“, – ამბობს ბავშვთა და ახალგაზრდობის განვითარების ფონდის დირექტორი ირაკლი ჟორჟოლიანი.

კონკურსის მთავარი მიმართულება, ახალგაზრდების დასაქმების, ასევე მათი სამოქალაქო აქტივობის ზრდის ხელშეწყობაა.

„ამ კონტექსტში შესაძლოა იდეა ეხებოდეს გარემოს დაცვაზე ზრუნვას, ჯანსაღი ცხოვრების წესის პოპულარიზებას, გადაწყვეტილებების მიღბის პროცესში შესაბამისი უნარ ჩვევების გამომუშავებას და ა.შ. კონკურსის მიზანი, ახალგაზრდული ორგანიზაციების მხარდაჭერა და ახალგაზრდებია დასაქმებაა“, –განმარტავენ სამინისტროს წარმომადგენლები.

მათი თქმით, კონკურსში მონაწილეობის მიღება შეეძლებათ, ახალგაზრდულ არასამთავრობო ორგანიზაციებსაც, რომლებიც საკუთარ პროექტებს ელექტრონულად გააგზავნიან. მათივე თქმით, თოთოეული პროექტის მაქსიმალური ღირებულება 25 000 ლარია.

„ჩვენთვის განსაკუთრებით პრიორიტეტულია რეგიონებიდან წარმოდგენელი პროექტები, მათი რაოდენობა შეზღუდული არ იქნება. მთავარია იდეა იყოს კარგი და საინტერესო“–ამბობს ჟორჟოლიანი.

იდეების კონკურსის შესახებ საინფორმაციო კამპანია, მთელი საქართველოს მასშტაბით იმართება.

იდეების კონკურსის ფარგლებში პროექტების მიღება მთელი საქართველოს მასშტაბით 27 თებერვლიდან დაიწყო და 27 მარტამდე გაგრძელდება.



[ლუბა გიორგაძე, ახალციხე]