‘ყველა ყველასთვის’ - სოციალური თანასწორობის დღე ახალციხეში [Video, Photo]

ქალაქის ცენტრალურ პარკში შეზღუდული შესაძლებლობების მქონე პირებმა ქუჩაში გამვლელებსა და ადგილობრივი ხელისუფლების წარმომადგენლებს ეტლებში ჩაჯდომა და იმ პანდუსებზე ასვლა შესთავაზეს, რომელიც იდეაში, პარკში მათი გადაადგილებისთვისაა დამონტაჟებული.

- ’ქალაქში არსად არაა პანდუსი. ეტლით გადაადგილება დახმარების გარეშე შეუძლებელია. ერთადერთი ცენტრალურ სკვერშია და ისიც სტანდარტებს არ შეესაბამება’, - გვეუბნება დავით გაბოძე, რომლისთვისაც რამდენიმე წლის წინ მომხდარი ავტოავარიის შემდეგ გადაადგილების ერთადერთი საშუალება ეტლია.



ღონისძიება არასამთავრობო ორგანიზაციების ’დემოკრატ მესხთა კავშირისა’ და ’ყველა ყველასათვის’ ორგანიზებით მოეწყო. ღონისძიებაში აქტიურად იყო ჩართული ’დემოკრატ მესხთა კავშირთან’ არსებული ახალგაზრდული ცენტრი.

- ’გვინდოდა ეს დღე აქციით აღგვენიშნა, რითაც ვიტყოდით, რომ ქალაქში შეზღუდული შესაძლებლობის მქონე პირთათვის სათანად გარემო არ არის. დამოუკიდებლად გადაადგილება შეუძლებელია, ამაში ყველა დარწმუნდა’, - გვითხრა აქციის ორგანიზატორმა ნათია გელაშვილმა.

აქციას ახალციხის მუნიციპალიტეტის გამგებლის მოვალეობის შემსრულებელი ბესიკ ხითარიშვილიც ესწრებოდა. ხითარიშვილმა აღნიშნა, რომ არსებული პანდუსები ნამდვილად არ შეესაბამება სტანდარტებს და განაცხადა, რომ მომავალში შშმ პირების უფლებებს აუცილებლად გაითვალისწინებენ.

- ’შევიმუშავებთ პროექტს, გავაკეთებთ ხარჯთაღრიცხვას და გამოვასწორებთ ამ დეფექტს. სადაც არ არის პანდუსები, იქაც გავითვალისწინებთ, რათა ეს ადამიანები თავისუფლად შევიდნენ შენობებში, აფთიაქებში, მაღაზიებში და სხვადასხვა დაწესებულებებში’, - განაცხადა გამგებლის მოვალეობის შემსრულებელმა.

მოქალაქეებს ახალგაზრდებმა საინფორმაციო ბუკლეტები დაურიგეს, რომელშიც მოცემული იყო ამონარიდი საქართველოს კანონიდან ’შეზღუდული შესაძლებლობის მქონე პირთა სოციალური დაცვის შესახებ”.

- ’დაშვებულია დასახლებული პუნქტების დაპროექტება და განაშენიანება, საცხოვრებელი რაიონების ფორმირება, საპროექტო გადაწყვეტილებების შემუშავება, შენობათა და ნაგებობათა, მათ შორის, სასწავლო-საგანმანათლებლო, კულტურულ-სანახაობითი და სპორტულ-გამაჯანსაღებელი ობიექტების, აეროპორტების, რკინიგზის სადგურების, საზღვაო და სამდინარო სატრანსპორტო საშუალებათა კომპლექსებისა და კომუნიკაციების, კავშირგაბმულობისა და ინფორმაციის ინდივიდუალური საშუალებების მშენებლობა და რეკონსტრუქცია, თუ ეს ობიექტები და საშუალებები არ მიესადაგება შეზღუდული შესაძლებლობების მქონე პირთა საჭიროებებსა და მოთხოვნილებებს’, - ამონარიდი კანონიდან. (მუხლი 8).

აქციაზე შეგროვდა ხელმოწერებიც, გარემოს ადაპტირებისთვის, რომელიც გადაეგზავნება ახალციხის მუნიციპალიტეტის გამგებელსა და საკრებულოს თავმჯდომარეს.

- ’გვინდა, რომ მივმართოთ ადგილობრივ ხელისუფლებას დამონტაჟდეს პანდუსები, რომლებიც ექვემდებარება სტანდარტებს’, - განაცხადა ნათია გელაშვილმა.

შეგახსენებთ, შშმ პირებისთვის არადაპტირებულ გარემოზე არაერთხელ წერდა ’სამხრეთის კარიბჭეც’. ჩვენი ერთ-ერთი სტატიის შემდეგ, რომელშიც გიამბობდით, რომ ადმინისტრაციულ შენობას პანდუსი გვერდითა შესასვლელიდან და ამავე დროს, ყოველგვარი სტანდარტის დაცვის გარეშე გაუკეთეს, რაც დისკრიმინაციული იყო შშმ პირებისთვის, შენობას ეს პანდუსი მოანგრიეს და დღემდე აღარ მიუშენებიათ.



[ნინო ბერიძე, ნუკა სტეფნაძე, ახალციხე]