უბნებში შშმ პირებისთვის კაბინები დგას, თუმცა, შენობებს პანდუსები არ აქვს

6 საარჩევნო უბანი ახალციხის მე-2 საბავშვო ბაღის შენობაში მეორე სართულზეა განთავსებული. უბანზე 4 საარჩევნო კაბინიდან ერთ-ერთი შეზღუდული შესაძლებლობის მქონე პირებისთვისაა განკუთვნილი, თუმცა ეტლით მისული ადამიანისთვის მეორე სართულზე ასვლა შეუძლებელია.

#6 საუბნო საარჩევნო კომისიის მდივანი მამუკა თამარაძე ამბობს, რომ თუ ასეთი პირი უბანზე ხმის მისაცემად მივა, მაშინ მას საარჩევნო უბნამდე მისვლაში თავად დაეხმარებიან. #6 საარჩევნო უბანზე 1114 ამომრჩეველია და როგორც თამარაძე ამბობს, მათ შორის შეზღუდული შესაძლებლობის მქონე არცერთი არაა.

ასევე შეზღუდული შესაძლებლობის მქონე პირთათვის სპეციალური საარჩევნო კაბინა დგას #4 უბანზე, რომელიც ახალციხის მე-6 საჯარო სკოლის შენობაშია განთავსებული. უბანი პირველ სართულზეა გახსნილი, თუმცა შენობაში შესასვლელად კიბის ავლა მაინცაა აუცილებელი. თუმცა ისევე როგორც #6 უბანზე, პანდუსი არც აქ არაა.

აღნიშნულ უბანზე 1 512 ამომრჩეველია და აქაც აცხადებენ, რომ მათ შორის, შეზღუდული შესაძლებლობის მქონე არცერთი პირი არაა.

[sknews.ge]