შშმ პირები ახალციხის მერობის კანდიდატებს შეხვდნენ

შეხვედრა, რომელიც ახალციხის დემოკრატიული ჩართულობის ცენტრში გაიმართა არასამთავრობო ორგანიზაციების „ყველა ყველასათვის“ , „დემოკრატ მესხთა კავშირის“ და ადგილობრივი ტელეკომპანია „მე–9 არხის“ ორგანიზებით მოეწყო.

ახალციხის მერობის 4 კანდიდატიდან შეხვედრას მხოლოდ „ქართული ოცნების“ კანდიდატი არ დაესწრო.

კანდიდატებმა არასამთავრობო ორგანიზაციის „ყველა ყველასთვის“ ხელმძღვანელის გელა ბარძიმაძის კითხვებს უპასუხეს.

შშმ პირებმა ქალაქში შეუსაბამო გარემოზე ისაუბრეს და დაინტერესდნენ მერობის კანდიდატებს თუ ქონდათ წინასაარჩევნო პროგრამაში გათვალისწინებული მოსახერხებელი პანდუსების გაკეთება ქუჩებში და შენობებში, ასევე მათი გამარჯვების შემთხვევაში თუ იზრუნებენ შშმ პირების გადამზადებასა და დასაქმებაზე.

კანდიდატებისგან შშმ პირებმა დაპირება მიიღეს, რომ გამარჯვების შემთხვევაში მათი პრობლემების მოგვარებაზე იზრუნებენ და დასაქმების საკითზეც იფიქრებენ.

შეხვედრას ადგილობრივი არასამთავრობო ორგანიზაციების გარდა, თბილისიდან და საჩხერიდანაც ესწრებოდნენ.

„ისევე, როგოც მთლიანად საქართველოში, ძალიან ცუდი მდგომარეობაა საჩხერეშიც. შეიძლება ითქვას, რომ გარემო ნაწილობრივ ადაპტირებულია. არის შენობები, რომელსაც აქვს პანდუსები და შეღწევადია, მაგრამ შიდა სივრცეა მიუწვდომელი. ერთადერთი, სადაც შესვლას შევძლებთ, საჩხერის საავადმყოფოა“, – ამბობს „საჩხერის შშმ პირთა რეგისტრირებული კავშირის“ გამგეობის თავმჯდომარე გიორგი გოგატიშვილი.

მისივე თქმით, ადგილობრივი თვითმმართველობა შშმ პირების დასაქმებაზეც უნდა ზრუნავდეს: „გვითხრეს, რომ ჩვენც მიგვეღო კონკურსში მონაწილობა, მაგრამ ამ შემთხვევაში ჩვენ მაინც დაზარალებული გამოვდივართ, რადგან ჩვენ წლების განმავლობაში ვერ გამოვდივართ გარეთ და შესაბამისად გადამზადებაც გვჭირდება. სწორედ ამ საკითხის მოგვარებაზე უნდა იზრუნონ“.

შეხვედრა შშმ პირთა ეროვნულ დღესთან დაკავშირებით შედგა. დისკუსიის დაწყებამდე შეზღუდული შესაძლებლობის მქონე პირებმა ქალაქის ცენტრალური პარკიდან ახალციხის მუნიციპალიტეტის ადმინისტრაციულ შენობამდე ტრანსფარანტებით მსვლელობა მოაწყეს.



[თინათინ ზაზაძე, ახალციხე]