ადმინისტრაციულ შენობას პანდუსი მოანგრიეს

შენობას, რომელშიც სამი საჯარო სამსახური, სამხარეო ადმინისტრაცია, მუნიციპალიტეტის გამგეობა და საკრებულოა განთავსებული, ორი კვირის წინ ის ერთადერთი პანდუსი მოანგრიეს, რომელიც შეზღუდული შესაძლებლობების მქონე პირებისთვის გვერდითა, დასავლეთის მხრიდან ჰქონდა მიშენებული.

ახალციხის მუნიციპალიტეტის საკრებულოს თავმჯდომარე მალხაზ გიქოშვილი ამბობს, რომ პანდუსი ადმინისტრაციული შენობის გვერდით დაწყებული სამშენებლო სამუშაოების გამო მოინგრა: “შენობის გვერდზე კერძო პირი სამშენებლო სამუშაებს აწარმოებს. პანდუსის გამო მუშებს სხვადასხვა სამშენებლო მასალის მიტანა უჭირდათ, ამიტომ მოინგრა”.

ეს იყო პანდუსი, რომელით სარგებლობაც მკვეთრი დახრილობის გამო ფაქტობრივად შეუძლებელი იყო. ამის შესახებ “სამხრეთის კარიბჭე” 26 მარტის თვეშიც წერდა.

მაშინ გაზეთი იკვლევდა რამდენად იყო ადაპტირებული ქალაქის ინფრასტრუქტურა შეზღუდული შესაძლებლობების მქონე პირებისთვის. ცხადია, დაკვირვების ობიექტი იყო ადმინისტრაციის შენობაც, სადაც სამი, ქალაქის მთავარი საჯარო სამსახური ფუნქციონირებს. შედეგად აღმოჩნდა, რომ შეზღუდული შესაძლებლობების მქონე მოქალაქეებისთვის პანდუსი შენობას უკანა მხარეს, სტანდარტების დარღვევით ჰქონდა მიშენებული. ადგილობრიოვ ხელისუფლებაში კი გვარწმუნებდნენ, რომ შენობა ადაპტირებული იყო.

არასამთავრობო ორგანიზაცია “დამოუკიდებელი ცხოვრების ახალგაზრდული ცენტრის” აღმასრულებელმა დირექტორმა კობა ნადირაძემ ამ ფაქტს დისკრიმინაციული უწოდა: “გამოდის, რომ ინვალიდობის მქონე პირებმა უკანა შესასვლელით უნდა იარონ, რომლითაც სხვა არავინ სარგებლობს, ეს დამამცირებელია”.

იმის გასარკვევად, ადმინისტრაციული შენობის რეაბილიტაციისას იყო თუ არა გათვალისწინებული შეზღუდული შესაძლებლობების მქონე პირების ინტერესები; რა სტანდარტების დაცვით გაკეთდა პანდუსი, რომელიც არის შენობის უკანა შესასვლელთან და რატომ უკანა შესასვლელთან, ”სამხრეთის კარიბჭემ” 20 მარტს გამგეობას ოფიციალური წერილით მიმართა. გარდა ამისა, ვითხოვდით იმ ნორმატიულ აქტს, რომელიც უნდა დაეცვა მშენებელს ადმინისტრაციული შენობის რეაბილიტაციისას. კითხვებზე პასუხი, რომელიც 27 მარტით თარიღდება, აპრილის დასაწყისში მივიღეთ.

- ”ქალაქ ახალციხეში ახალი ადმინისტრაციული შენობის რეაბილიტაციის პერიოდში გათვალისწინებული იყო შეზღუდული შესაძლებლობების მქონე მოქალაქეებისთვის (ეტლით გადაადგილებისთვის) შესაბამისი პანდუსის მოწყობა, რომელიც გაკეთდა შენობის დასავლეთის მხრიდან, მოქალაქეების შესასვლელში”, - ეს არის პასუხი, ჩვენს მიერ მოთხოვილ ინფორმაციაზე. მასში არაფერია ნახსენები ნორმატიული აქტის შესახებ.

საკრებულოს თავმჯდომარის თქმით, პანდუსი ისევ ძველ ადგილას უნდა აღდგეს. დააკმაყოფილებს თუ არა იგი სტანდარტებს, ამას მომავალი გვიჩვენებს.

[მანანა სარაშვილი, ახალციხე]