ადიგენში ‘ოცნების’ მხარდამჭერებმა აქცია დაასრულეს

აქციის მონაწილეები ამბობენ, რომ აქციების გაგრძელებას აღარ აპირებენ.

შეგახენებთ, 20 თებერვალს, ზაქარია ენდელაძემ პირველი მოადგილე, მინდია ჯელია, თანამდებობიდან მოხსნა. ამ ამბავს, დღეს, დილიდან, ადიგენში, მინდია ჯელიას მხარდამჭერების საპროტესტო აქცია მოჰყვა. აქციის მონაწილეები ზაქარია ენდელაძისგან, რომელიც ამავე დროს პარტიის თავმჯდომარეა ადიგენში, ითხოვედნნ პასუხს კითხვაზე, რატომ გაათავისუფლა პირველი მოადგილე; ასევე, აქტივისტები პარტიის რიგგარეშე ყრილობის მოწვევასა და ახალი ხელმძღვანელების არჩევას მოითხოვდნენ.

ზაქარია ენდელაძე აქციის მონაწილეებს არ შეხვედრია, ჟურნალისტებთან კი განაცხადა, რომ მინდია ჯელიას მოხსნა, მისი პირადი გადაწყვეტილება იყო, საკრებულოს თავმჯდომარის არშემდგარ იმპიჩმენტთან ამ ამბავს არანაირი კავშირი არ აქვს და ამ თემაზე, ახსნა–განმარტებების გაკეთებას არ აპირებს. მან ასევე აღნიშნა, რომ ამ ეტაპზე, არც რიგგარეშე ყრილობის მოწვევას გეგმავს.

ადიგენში იმყოფებოდა "ქართული ოცნების" რეგიონული ორგანიზაციის ხელმძღვანელი დავით ტაბატაძეც. მან "სამხრეთის კარიბჭეს" განუცხადა, რომ ადიგენში სხვა საქმეზე იყო და ამ ვითარებას შემთხვევით შეესწრო: "ეს ამბავი ჩემთვის მოულოდნელი იყო. პარტიაშიც არ იციან და აუცილებლად ვაცნობებ", – განაცხადა ტაბატაძემ და დაამატა, რომ ამ მდგომარეობაში უფრო პიროვნულ ინტერესებს ხედავს. თუმცა, რას გუსლისხმობდა, ამის დაკონკრეტება აღარ ისურვა.

მინდია ჯელია, გამგებლის ყოფილი პირველი მოადგილე, რომლის მოხსნასაც ეს აქცია მოჰყვა, ამბობს, რომ მისი აზრით, პარტიის თავმჯდომარე, ზაქარია ენდელაძე, პარტიის რიგგარეშე ყრილობას მაინც მოიწვევს.



[ლუბა გიორგაძე, ნინო ნარიმანიშვილი, ადიგენი]